Бразилия президенти Жаир Болсонару 15 март куни Бразилия кардиологлар жамияти раҳбари, доктор Марселу Кейрога генерал Эдуардо Пазуэлланинг ўрнига соғлиқни сақлаш вазири лавозимига тайинланганини эълон қилди. Бу ҳақда «Интерфакс» хабар берди.
«Бугун Марсель Кейрога лавозимга тайинланди. Уни бир неча йилдан бери биламан... Пазуэлланинг ишини давом эттириб, яхши ишлаш учун унда керакли барча нарса бор», — деган Болсонару.
Президентнинг сўзларига кўра, Кейрога ўзига ишчи жамоа танлайди ва бир-икки ҳафтадан сўнг иш бошлайди.
«Марсель Кейрога соғлиқни сақлаш масаласидаги муаммоларини жуда яхши тушунади, у бутун дунёга таъсир қилаётган ушбу касалликдан вафот этаётганлар сонини камайтириш бўйича зарур чораларни кўради», — деб қўшимча қилган Болсонару.
Кейрога коронавирус пандемияси даврида соғлиқни сақлаш вазири лавозимига тайинланган тўртинчи одам бўлди.
У мамлакатда пандемиянинг энг оғир даврларидан бирида ушбу лавозимга киришмоқда. 15 март ҳолатига кўра, Бразилияда коронавирус билан касалланганлар сони 11,5 миллионга етди, 280 мингга яқин одам вирус қурбонига айланди. Мамлакат шифохоналарида барча ўринлар тўлган.
Лавозимидан кетаётган Пазуэлла расмий тиббий тайёргарликка эга эмаслиги ва мамлакатдаги пандемия билан боғлиқ аҳвол учун кўплаб танқидларга учради. Аввалроқ Пазуэлла давлат раҳбари уни «алмаштириш» масаласини кўриб чиқаётганини тан олган эди, лекин унинг ўзи истеъфога чиқишини сўрамаганини таъкидлаган.
Аввалроқ дунё бўйича бир ҳафта ичида коронавирус билан касалланиш ҳолатлари яна кўпайгани ва Бразилияда 413 мингдан ортиқ кишида вирус қайд этилгани ҳақида хабар берилган эди.
Шунингдек, Бразилиянинг соғлиқни сақлашни тартибга солувчи Анвиса компанияси Pfizer ва BioNTech томонидан ишлаб чиқарилган коронавирусга қарши вакцинадан фойдаланишга рухсат берди.
Изоҳ (0)