Тошкентнинг Мирзо Улуғбек, Чилонзор ва Юнусобод туманидаги барча мактаблар онлайн таълимга ўтади

Тошкент шаҳрининг Мирзо Улуғбек, Чилонзор ва Юнусобод туманлари мактабларида 16 мартдан бошлаб ўқув машғулотлари онлайн тарзда ташкил этилади, деб хабар берди шаҳар ҳокимлиги матбуот хизмати.

Ушбу туманлар ҳудудида фаолият олиб бораётган нодавлат ва хусусий таълим ташкилотларига 16 мартдан бошлаб бир марталик карантин муддатига (14 кун) ўқувчиларни масофавий шаклда ўқитишга ўтказиш тавсия этилган.

Тошкентдаги бошқа туманларда ўқиш баҳорги таътилга қадар карантин талабларига тўлиқ риоя этилган ҳолда анъанавий давом эттирилиши маълум қилинган.

Шунингдек, Халқ таълими вазирлиги матбуот хизмати коронавирус кенг тарқалишининг олдини олиш мақсадида Тошкентдаги айрим мактабларда ўқиш босқичма-босқич масофавий шаклга ўтказилмоқда, деб хабар берди.

«Ҳудудлар раҳбариятининг коронавирус тарқалишини олдини олишга қаратилган чораларни жорий этиш бўйича ваколатини инобатга олиб, коронавируснинг кенг тарқалишини олдини олиш мақсадида Тошкент шаҳрининг айрим мактабларида ўқиш босқичма-босқич масофавий шаклга ўтказилмоқда», – дейилади хабарда.

Халқ таълими вазирлигининг маълумотларига кўра, мактабларнинг онлайн таълимга ўтиши тўғрисида маълумот мактаб маъмурияти томонидан тақдим этилади.

«Масофавий ўқитишга ўтган мактаб ўқувчилари Онлайн мактаб лойиҳасининг телевизион дарслари орқали сабоқ олишлари мумкин. Ота-оналардан фарзандларига масофадан ўқитишда ёрдам беришни илтимос қиламиз», – дейилади вазирлик хабарида.

Тошкент шаҳар Санитария-эпидемиология хизмати (СЕХ) бошлиғи Малика Қудратхўжаева томонидан 13 март куни шаҳар Соғлиқни сақлаш бош бошқармаси бошлиғи Анвар Алимовга чиқарилган хатда маълум қилинишича, Тошкентда йил бошидан бери юздан ортиқ ўқувчиларда коронавирус инфекцияси аниқланган. «Дарё»нинг расмий доиралардаги манбаси хатнинг ҳақиқий эканини тасдиқлади.

Хатнинг бир қисмида «жорий йилнинг ўтган даври мобайнида» Тошкент шаҳрида 181 нафар мактаб ўқувчисида коронавирус инфекцияси аниқлангани ҳақида сўз боради. Хатнинг бошқа бир қисмида эса «шаҳар бўйича 77 та умумтаълим мактабларининг 150 нафар ўқувчисида» касаллик қайд этилгани ҳақида сўз боради. Шунингдек, хатда бир қатор мактаблар кесимида касалланган ўқувчи ва ўқитувчилар сони очиқланган бўлиб, унда жами 90 нафар ўқувчининг мактаблари кўрсатиб ўтилган. Жумладан, Юнусобод туманидаги

• 86-мактабининг 16 нафар ўқувчиси ва 6 нафар ўқитувчисида,

• 235-мактабнинг 14 нафар ўқувчиси ва 3 нафар ўқитувчисида,

• 220-мактабнинг 5 нафар ўқувчисида,

• 43-мактабнинг 4 нафар ўқувчисида,

• 302, 97, 51, 258-мактабларнинг 3 нафардан ўқувчиларида;

• 112-мактабнинг 6 нафар ўқувчисида,

• 222, 308-мактабларнинг 2 нафардан ўқувчиларида;

• 103-мактабнинг 4 нафар ўқувчисида,

• 280, 114-мактабларнинг 2 нафардан ўқувчиларида;

• 300-мактабнинг 4 нафар ўқувчисида,

• 47, 268-мактабларнинг 2 нафардан ўқувчиларида;

• 282-мактабнинг 4 нафар ўқувчисида,

• 307-мактабнинг 2 нафар ўқувчисида;

• 296-мактабнинг 2 нафар ўқувчисида,

• 236, 44-мактабларнинг 3 нафардан ўқувчиларида;

• 316-мактабнинг 3 нафар ўқувчисида;

• 144-мактабнинг 2 нафар ўқувчисида,

• 28-мактабининг 2 нафар ўқувчисида коронавирус инфекцияси аниқланган.

СЕХ маълумотларига кўра, аниқланган 1717 беморнинг 222 нафари (13 фоизи) 14 ёшгача бўлган болалар, 78 нафари (4,5 фоизи) 15-19 ёшлилар, 210 нафари (12,2 фоизи) 20-29 ёшлилар, 264 нафари (15,4 фоизи) 30-39 ёшлилар, 234 нафари (13,5 фоизи) 40-49 ёшлилар, 244 нафари (14,3 фоизи) 50-59 ёшлилар, 465 нафари (27,1 фоизи) 60 ёш ва ундан катталардир.

«Ижтимоий таркибига кўра, 315 нафар (18,3 фоиз) бемор корхона, ташкилот, муассаса ходимлари, 630 нафари (36,7 фоизи) уй бекалари, 48 нафари (2,9 фоизи) тиббиёт ходимлари, 57 нафари (3,3 фоизи) олийгоҳ талабалари, 181 нафари (10,5 фоизи) мактаб ўқувчилари, 76 нафари (4,4 фоизи) уюшмаган болалар, 14 нафари (0,8 фоизи) уюшган болалар, 7 нафари (0,4 фоизи) мурувват уйи тарбияланувчилари, 2 нафари (0,1 фоизи) чет эл фуқаролари, 49 нафари (3,0 фоизи) ўқитувчилар ва 338 нафари (20,0 фоизи) бошқа гуруҳдаги аҳолидир», — дейилади СЕХ хатида.

Бундан ташқари, 15 март куни Тошкент шаҳрининг Олмазор туманидаги 117-сонли мактабгача таълим муассасаси фаолияти вақтинча тўхтатилган. Ушбу болалар боғчасида 13 март куни иккита ўқувчи ва иккита тарбиячида COVID-19 аниқланди.