Сенат раиси Танзила Норбоева Республика хотин-қизлар жамоатчилик кенгашининг 15 март, душанба куни ўтказилган биринчи йиғилишида «Зулфия»чилар ва бошқа турли мукофотларни қўлга киритган аёлларнинг кейинги фаолиятидан қониқмаётганини қайд этди, дея хабар бермоқда «Дарё» мухбири Миролим Исажонов.
Республика хотин-қизлар жамоатчилик кенгаши раиси Танзила Норбоеванинг таъкидлашича, давлат мукофотини қўлга киритган хотин-қизлар ўз ҳудудларида аёллар муаммоларини ҳал қилишда самарали фаолият олиб боришмаяпти.
«Мен ҳайрон қоламан-да, давлат мукофотини олиш керак бўлса, талабгорлар кўпайиб кетади. Жорий йил 8 март арафасида 121 нафар хотин-қизга турли мукофотлар берилди. Қани кейин ўша аёллар? ‘Зулфия’ни ҳар йили бир вилоятдан 2 нафардан номзод олади. Кейин қани улар? Нега мана шунақа ишларга ёрдам беришмайди? Хотин-қизлар масалалари бўйича ишлаётган ҳоким маслаҳатчилари, қани ўша аёллар? Нима учун улар шундай оғир масалалар бўйича ишлашмаяпти? Буни сизларга нисбатан жуда қаттиқ эътироз деб тушунинглар.
Вилоят, туманларда шунақа муаммоли хотин-қизлар бўладиган бўлса, бундан хулоса чиқаришинглар керак. Ишни тўғри ташкиллаштира олмагансиз, мувофиқлаштирмагансизлар, умуман натижа беролмагансизлар, деган баҳони қўямиз. Сизлар ҳозир бизга индамаяпти, давлат раҳбари эътироз қилмаяпти, деб бемалол юрибсизлар. Унақа бўлмайди энди!
Ҳамма фаол аёллар, давлат мукофотини олган аёлларни йиғинглар. ‘Зулфия’чи қизлар бор, ҳар йили йўқ бўлиб кетяпти. Олади, йўқ бўлади, олади, йўқ бўлади, қум ичига сингиб кетади. Ишлатинглар-да ўшаларни. Давлат мукофотига тавсия қилинаётганда ойлик олмасдан ҳам, жамоатчилик асосида у ишни қилдим, бу ишни қилдим, деб ёзиб берилади-ку тавсияномасида. Қани уларнинг кейинги фаолияти? Менимча, давлат мукофотига муяссар бўлганларнинг фаоллиги ўн карра ошиши керак. Улар шундан кейин йўқ бўлиб кетади. Сизлар нега ўша аёлларни йиғиб, озгина гапирмайсизлар? Сизлар уларни йўналтириб, рағбатлантирмайсизлар, сизлар қўллаб-қувватламайсизлар. Шу боис у аёллар ўзидан-ўзи бориб, мен шу ишни қилиб берай, демайди.
Кейин давлат мукофотига тавсия қилишда натижали аёлларни тавсия қилишларингиз керак. Бирор ишни қилиб қўйган аёлларни тавсия этинглар. Шунчаки, таниш-билишчилик ёки чиройли кўриниши учун давлат мукофоти берилмайди», — деди Норбоева.
Мавзуга доир:
- Шавкат Мирзиёев чустлик ака-ука тадбиркорларнинг онасини мукофотлади
- Шавкат Мирзиёев унвон, орден ва медаллар билан тақдирланган бир гуруҳ хотин-қизларга мукофотларни топширди (фото)
- Шавкат Мирзиёев «Зулфия номидаги Давлат мукофоти билан тақдирлаш тўғрисида»ги қарорни имзолади. Тўлиқ рўйхат
- 100 ёшдан ошган қашқадарёлик момо «Шуҳрат» медалига муносиб кўрилди
Изоҳ (0)