Қозоғистон таълим ва фан вазири Асхат Аймагамбетов мактабларда 12 йиллик таълим ва лотин ёзувига ўтиш режалари ҳақида гапирди. Бу ҳақда Tengrinews хабар берди.
Вазирнинг сўзларига кўра, янгиланган таркибга ўтиш режаси 100 фоиз ишлаб чиқилган.
«Барча ҳудудларда болалар хавфсизлигини таъминлаш мақсадида барча мактаблар видеокузатув камераси билан 100 фоиз, иситиладиган ҳожатхоналар билан 99 фоиз таъминланган.
Мамлакатда 2023 йилдан бошлаб босқичма-босқич 12 йиллик таълимга ўтиш режалаштирилган. Бунинг учун қилинадиган ишлар кўп, хусусан, давлат стандарти, ўқув дастурлари ва намунавий ўқув дастурларини янгилаш сингари. Математика, информатика ва тиллар устувор фанга айланади. Қозоғистон тарихи ва жаҳон тарихи бўйича ягона дарсликлар жорий этилади. 2023 йилдан бошлаб лотин графикасини жорий этиш режалаштирилмоқда», — деди Аймагамбетов Таълим ва фан вазирлигининг кенгайтирилган ҳайъат йиғилишида.
Аввалроқ Қозоғистон Ички ишлар вазирлиги Олмаотада болаларни кузатувчи тажриба лойиҳасини йўлга қўйгани ҳақида хабар берилганди. Таъкидланишича, кузатувчи қурилманинг ишлаши учун интернетга уланиш шарт эмас. Уни ишлатиш учун фақат Bluetooth’нинг ўзи кифоя.
Изоҳ (0)