Пекинга ёпирилган сўнгги ўн йилликдаги энг кучли қум бўрони — фотосуратларда
Хитой пойтахти Пекин сўнгги ўн йил ичидаги энг кучли қум бўронига дуч келди. Пойтахтдаги иккита аэропорт 400 га яқин авиарейсни бекор қилди — Шоуду халқаро аэропортида 15 мартга режалаштирилган 1141 та авиарейснинг 247 таси, Дасин аэропортида 846 та авиарейсдан 181 таси. Метеорологларнинг прогнозларига кўра, бўрон 16 март тонгига қадар давом этади ҳамда мамлакатдаги 12 та вилоят ва минтақага — Шинжон-Уйғур автоном вилоятидан то Россия чегарасидаги шимолий-шарқий Хейлунсзян вилоятигача ўз таъсирини ўтказади. Табиий офат туфайли Пекин шаҳри қай тусга киргани ҳақида «Интерфакс» фоторепортаж тайёрлади.
Пекинда қум бўрони тирбандликларга сабаб бўлди. Майда қаттиқ зарралар концентрацияси ПМ 10 шаҳарнинг марказий туманларида бир куб метрга 8000 микрограммдан ошиб кетди, бу Жаҳон соғлиқни сақлаш ташкилоти (ЖССТ) томонидан белгиланган максимал меъёр — 50 микрограмм/кубометрдан 160 марта юқори демакдир.Фото: AP Photo
Экологлар ушбу ифлосланган ҳавонинг инсон саломатлигига зарарли таъсири ҳақида огоҳлантирди, бундай ҳавода энг кичик қум зарралари саноат ва автомобиль чиқиндилари билан аралашиб кетган бўлади.Фото: AP Photo
Айрим экологлар ушбу чанг бўронларига сабаб Ички Мўғулистоннинг чўл ва ярим чўл минтақаларидаги кўплаб қаровсиз конлар, шунингдек, мамлакатнинг шимолида ўтган асрнинг 60—70 йилларида дарахтларнинг назоратсиз кесилиши, деб ҳисобламоқда.Фото: AP Photo
Хитойда қум бўронлари учун тўрт даражали рангда об-ҳаво огоҳлантириш тизими мавжуд бўлиб, булар биринчи қизил — энг хавфли, сўнгра тўқ сариқ, сариқ ва кўк ранглар билан белгиланади. Айни пайтда шаҳарда хавфнинг сариқ даражаси эълон қилинган.Фото: AP Photo
Изоҳ (0)