Видео: «Мойка»дан чиқиши билан авария учраган Ferrari

Интернетда Туркиядаги «мойка»дан чиқиши билан аварияга учраган Ferrari 458 Italia’нинг видеоси тарқалди, деб хабар беради Motor.

Эълон қилинган кадрлардан кўриш мумкинки, қора Ferrari 458 Italia ҳайдовчиси «мойка»дан бир қаторли йўлга эффект билан чиқишга қарор қилган. Афтидан, у газ тепкисини жуда қаттиқ босиб юборган, натижада суперкар орқа чап ғилдираги билан бетон тўсиққа урилган. Шундан сўнг Ferrari орқа томонга айланиб кетган ва инерция сабаб ўнг томони билан устунга тўқнашган.

Италия суперкарини ким бошқаргани ҳозирча номаълум. Версиялардан бирига кўра, аварияни «автомойка» ходими содир этган. Бошқа гувоҳларнинг айтишича, Ferrari’ни автомобиль эгасининг ўзи бошқарган. «Нима бўлганда ҳам 458 Italia’ни эндиликда қиммат турувчи таъмирлаш ишлари кутмоқда», — дейилади хабарда.

Ferrari 458 Italia 2009 йили Франкфурт автосалонида тақдим этилган. Спорткар 570 от кучига эга 4,5 литрли V8 двигатели билан жиҳозланган бўлиб, агрегат етти поғонали робот узатмалар қутиси ёрдамида бошқарилади. Икки эшикли модель соатига 100 километр тезликка 3,4 сонияда эришади. Максимал тезлиги — 320 километр/соат.

Аввалроқ ҳиндистонлик харидор янги Kia’ни салондан олиб чиқаётиб, деворга уриб олгани тўғрисида хабар берилганди.