Интернетда Maserati компаниясининг Италия Алпларида — Ливиньо комуннаси яқинида қишги тестдан ўтаётган МC20 купесининг видеоси пайдо бўлди. Инқилобий суперкар — марканинг сўнгги 16 йил ичида яратилган ўрта моторли биринчи машинаси ҳисобланади. Унинг двигатели мутлақо янги бўлиб, Maserati Innovation Lab. техник марказида яратилган, деб хабар беради Motor.
Роликдаги қорли трасса бўйлаб ҳаракатланаётган Maserati МC20’нинг видеоқаторлари тоғдаги бўронли кадрлар билан бирлашиб кетган — бу суперкарнинг «портловчи» хусусиятига хос. Икки эшикли машина капоти остидан Maserati томонидан сўнгги 20 йилдан буён биринчи бор тақдим этилган V6 Nettuno битурбомотори ўрин олган. У Ferrari F154 V8’нинг узоқ «қариндоши» ҳисобланиб, «Формула-1» болидлари каби комбинацияланган ёқилғи сепгич ва иккита ўтолдиргичли олд камерали тизим билан жиҳозланган.
Машина мотори 630 от кучи ва 730 Нм айланувчи моментни тақдим этишга қодир бўлиб, дақиқасига 3000—5500 диапазондаги айланишни амалга оширади. Орқа ўқдаги тортувчи куч саккиз поғонали «робот» орқали бошқарилади. МC20 соатига 100 километр тезликка 2,9 сонияда, 200 километр/соат тезликка эса 8,8 сонияда эришади. Максимал тезлиги — 325 километр/соат.
Аввалроқ General Motors концерни назорати остида бўлган GMC маркаси янги Hummer’нинг имкониятлари намойиш этилган навбатдаги ролик билан бўлишганди. Видеода GMS Hummer EV электропикапининг прототипи қор уюмида «кулча ясаганини» кўриш мумкин.
Изоҳ (0)