Россияда маҳаллий Aurus автомобилларини яратиш билан шуғулланувчи «НАМИ» федерал давлат унитар корхонаси премиум маркадаги биринчи электромотоциклнинг ишчи прототипини намойиш этди. Янги техниканинг яратилиши тасвирланган уч дақиқали видео Россия Саноат ва савдо вазирлигининг Instagram’даги саҳифасида пайдо бўлган.
Таъкидланишича, маҳаллий мотоциклни яратиш ғояси орқали шу турдаги хориж техникалари ўрнини эгаллаш кўзда тутилган. Эслатиб ўтамиз, «Ягона модуль платформа» («Кортеж») 2012 йилда ишга туширилган бўлиб, мотоциклнинг ташқи кўринишига оид патент «Росстандарт» базасида 2020 йилнинг ёзида пайдо бўлганди.
Россия электробайки бошқарилувчи шамол ойналар, орқани кўришга мўлжалланган тўғри бурчакли ингичка кўзгу ва ён томонларида бир жуфт «кофр» билан жиҳозланган. Шунингдек, «НАМИ» видеосида махсус хизматлар учун мўлжалланган ва аравачали мотоцикл эскизлари намойиш этилган.
https://www.instagram.com/tv/CMRLZiRh1S-/
Саноат ва савдо вазирлигининг қайд этишича, мотоциклнинг оғир синфга кирувчи алоҳида версиясидан ИИВ ва ФВВ вазифаларини бажаришда фойдаланиш мумкин, бундан ташқари, мотоцикл эркин савдолар учун ҳам мўлжалланган.
Aurus мотоцикли энг юқори қуввати 140 киловатт ёки 190 от кучига тенг электродвигатель билан жиҳозланган. Икки ғилдиракли Aurus’нинг соатига 100 километр тезликка эришиши учун 3,7 сония кифоя. Максимал тезлиги ошкор этилмаган, тахминларга кўра, у 250 километр/соатни ташкил этади.
Эслатиб ўтамиз, 2020 йилнинг апрелида Россия Саноат ва савдо вазирлиги раҳбари Денис Мантуров анчадан буён Aurus лимузинидан фойдаланиб келаётган мамлакат президенти Владимир Путин дастлабки вақтларда автомобилнинг техник жиҳатларини такомиллаштириш бўйича тавсиялар бериб келганини маълум қилганди.
Изоҳ (0)