Жиззах вилояти Шароф Рашидов туманида икки юк машинаси иштирокида ЙТҲ содир этди, дея хабар бермоқда ЙҲХББ матбуот хизмати.
Маълум қилинишича, 10 март куни 13-туман ҳудудидан ўтган халқаро аҳамиятга эга М-39 Термиз–Тошкент автомобиль йўлининг 996-километри довон қисмидан ҳаракатланиб келаётган Бухоро вилоятида яшовчи (1985 йилда туғилган) ҳайдовчи бошқарувида бўлган Isuzu русумли юк машинасига белгиланган меъёрдан ортиқ юк ортилиши оқибатида бошқарувни йўқотган.
Натижада ўзидан олдинда ҳаракатланиб кетаётган, Хоразм вилоятида яшовчи (1983 йилда туғилган) ҳайдовчи бошқарувидаги Isuzu русумли автомашинанинг орқа қисмига урилиши оқибатида йўл-транспорт ҳодисасини содир этган.
Оқибатда бошқарувни йўқотган юк машинаси салонида бўлган ҳайдовчи тан жароҳати олиб, Республика шошилинч тиббий ёрдам илмий маркази Жиззах филилалига ётқизилган.
Ўрганиш натижаларига кўра, орқа тарафдан ҳаракатланиб келган Isuzu ҳайдовчиси автомашинага белгиланган меъёрдан ортиқ юк ортгани, М-39 йўлининг довон қисмидан тушиб келишда юк оғирлиги билан машинанинг тормоз тизими ҳаво компрессори орқали ишлашини инобатга олмасдан, ҳайдовчи тажрибасизлиги оқибатида тормоз тизимини кескин босган. Натижада транспорт воситасини тўхтатиб қолиш имконияти бўлмагани аён бўлган.
Шунингдек, суриштирув давомида юк машинасининг юк кўтариш имконияти 7580 килограммни ташкил этса-да, ҳайдовчи томонидан машинага 15 000 килограммдан ортиқ юк ортилгани маълум бўлган.
Ҳозирда ҳодиса юзасидан суриштирув ҳаракатлари олиб борилмоқда.
Бундан аввал Наманганда қисқа туташув сабаб Nexia-2 ёниб кетгани, Тошкентда юз берган ЙТҲда Cobalt «учиб», бошқа Cobalt’нинг устига тушгани ҳамда Тошкентда Nexia автобусга урилиб, уни ағдариб юборгани ҳақида хабар берилганди.
Изоҳ (0)