AstraZeneca эмлашнинг ножўя таъсири тўғрисидаги хабарларга жавоб берди

AstraZeneca компаниясининг вакили вакцинанинг юзага келиши мумкин бўлган ножўя таъсирлари сабабли Европанинг бир нечта мамлакатларида тақиқлангани ҳақида хабарларга муносабат билдирди. CNBC канали билан суҳбатда у журналистларга вакцинанинг безарар эканини айтган.

«Беморларнинг хавсизлиги AstraZeneca учун энг устувор масала. Тартибга солувчилар фақат самарадорлиги юқори ва хавфсиз вакциналарни фойдаланиш учун тасдиқлайди ва AstraZeneca компаниясининг вакцинаси шундайлардан бири. Вакцинанинг хавфлсизлиги батафсил ўрганилган ва ижобий хулоса берилган», — деб таъкидлаган компания вакили.

Ҳозиргача Европанинг тўққиз мамлакати вакцинация қилинган беморларда тромб туфайли AstraZeneca билан эмлашни тўхтатган ёки вақтинча чеклаб қўйган. Австрия, Эстония, Латвия, Литва ва Люксембург давлатлари Европанинг 17 мамлакатига етказиб берилган бир миллион дозадаги вакцинадан фойдаланишни тўхтатган. Шунингдек, Дания, Исландия ва Норвегия ҳам ушбу вакцинадан фойдаланишни тўхтатган.

Европанинг Дори-дармон воситалари агентлиги маълумотларига кўра, Евроиттифоқ ҳудудида AstraZeneca вакцинаси билан эмланганларнинг 22 нафарида тромб пайдо бўлиш ҳолати қайд этилган. Бу ҳодиса вакцинадан фойдаланиш билан боғланмаган, лекин ўлим ҳолатларини текшириш давом этмоқда.

Аввалроқ Жанубий Корея ҳукумати  COVID-19’га қарши AstraZeneca вакцинаси билан эмланган икки кишининг ўлими юзасидан тергов бошлагани ҳақида хабар берилган эди.