Beeline Uzbekistan бош директорлиги лавозимига тайинланган Арташес Давтян Тошкентга етиб келмасидан туриб, мазкур лавозимдан воз кечди, деб хабар беради Uzzoom нашри.
Аввалроқ 9 март куни VEON компанияси Арташес Давтян 2021 йил 15 мартдан Beeline Uzbekistan бош директорлиги лавозимига тайинланганини эълон қилганди. Давтян Beeline Uzbekistan’га FMCG, Gillette, PepsiCo ва Mars каби халқаро компаниялардаги раҳбарлик тажрибалари билан қўшилди. Beeline’га қадар у ўзининг «Яндекс.Лавка» савдо маркасини бошқариб келган.
«Раҳбарлик лавозимидан воз кечилишига Unitel МЧЖга нисбатан тергов ишлари ўтказилаётгани тўғрисида маълумотлар сабаб бўлган ёки бўлмагани — номаълум, бироқ нима бўлганда ҳам мазкур тайинлов Beeline тарихидаги энг қисқа карьерага айланмоқда», — дейилади хабарда.
VEON ҳозирда ўзининг сайтидан Давтяннинг тайинловига оид пресс-релизни ўчириб ташлаган.
Эслатиб ўтамиз, 2020 йилнинг октябрида Beeline Uzbekistan бош директори Сергей Афонин эгаллаб турган лавозимидан кетишга ва ўз карьера йўлини VEON компанияси гуруҳидан ташқарида давом эттиришга қарор қилгани тўғрисида хабар берилганди. VEON Group Сергей Афонинни 2019 йил 1 мартдан Beeline Uzbekistan бош директори лавозимига тайинлаган эди. Бунга қадар у Beeline Russia Жанубий минтақавий филиали директори, Россиядаги йирик FMCG-компания тижорий директори лавозимларида ишлаган.
Изоҳ (0)