Сирдарёда поезд платформаси устига ортилган контейнердан ярим тайёр тери маҳсулотларини ўғирлаган шахслар ушланди, деб хабар беради ИИВ Транспортда хавфсизликни таъминлаш бош бошқармаси.
Маълум қилинишича, 3 март куни Сирдарё вилояти ИИБ ТХТБга Янгиер темир йўл бекати навбатчиси Янгиер темир йўл бекатидан ўтаётган 3001-сонли юк поезди таркибидаги платформа устига ортилган контейнернинг эшиги очиқлиги ҳақида хабар берган.
Терговга қадар текширув ҳаракатлари давомида Бекобод—Чуқурсой йўналишидаги 3001-сонли юк поезди таркибида 36-ўринда турган платформа устига ортилган контейнер Гулистон темир йўл бекатида ТХТБ ходимлари ва юк қабул қилиб топширувчилари билан биргаликда текшириб кўрилган. Текширув давомида контейнернинг пломбаси йўқлиги натижасида ушбу контейнернинг бир табақа эшиги очиқ ҳолатда тургани, вагон ҳужжатларига кўра, 770 дона қоп ярим тайёр тери маҳсулоти ортилганлиги ва уларда камомад аниқланган.
Ҳолат юзасидан 6 март куни ТХТБ ходимлари томонидан олиб борилган тезкор қидирув ишлари натижасида ушбу ўғирликни Бекобод—Ховос перегони 30-31 километр оралиғида тўрт нафар бекободлик фуқаро содир этганлиги аниқланган.
Улардан 16 та қоп ярим тайёр тери маҳсулоти далилий ашё тариқасида олинган ва контейнерга комиссия аъзолари иштирокида юкланиб, камомад бартараф этилгани ҳақида далолатнома тузилган. Ҳозирда суриштирув ишлари давом этмоқда.
Аввалроқ Ангренда беш киши ҳаракатланаётган вагондан кўмир ўғирламоқчи бўлгани тўғрисида хабар берилганди.
Изоҳ (0)