Xiaomi расман Мi 10S’ни тақдим этди: Snapdragon 870 процессорига эга флагман

Хитойнинг Xiaomi компанияси аввалги авлод флагманлар линейкасини янги модель — Мi 10S смартфони билан бойитди, деб хабар беради Hi-Tech.Mail.ru. Компания расман қурилмани намойиш этган.

Xiaomi Mi 10S ҳозирда савдолардан олинган ўтган йилги Мi 10 ва янги Мi 11 флагмани ўртасидаги қурилмага айланган. У қора, оқ ёки кўк рангли шиша қопқоққа эга стандарт дизайнга эга.

Смартфон янги Snapdragon 870 процессорида ишлайди — бу олдинги авлод Snapdragon 865’нинг яхшиланган версияси бўлиб, унинг ядросидаги такт частотаси оширилган ва замонавий 5G-модель қўшилган. Шунингдек, унга сиғими 5000 мА/соатга тенг аккумулятор ўрнатилган бўлиб, у 33 ваттли тезкор қувватланиш функциясига эга. Камералари сони тўртта — асосий камераси 108 мегапикселл.

Компания ҳозирча смартфоннинг барча жиҳатларини ошкор этмаган, унинг тўлақонли тақдимоти 10 март куни бўлиб ўтади — ўшанда янги моделнинг барча техник тавсифи ва нархи маълум бўлади.

Аввалроқ Redmi компанияси К40 сериясига кирувчи учта смартфонини намойиш этгани тўғрисида хабар берилганди.