Realme GТ — Snapdragon 888 процессорида ишлайдиган энг арзон смартфон тақдим этилди

Realme компанияси Snapdragon 888 чипида ишлайдиган энг ҳамёнбоп смартфон — Realme GТ’ни тақдим этди, деб хабар беради «Afisha.uz».

Таъкидланишича, янги модель «1950- ва 1960 йиллардаги GТ классига кирувчи кучли спорт автомобилларидан илҳомланилган ном ва дизайнга» эга. Сотувга учта версия чиқади, улардан биринчиси кумушранг бўлиб, 3D-шиша нақшлар туширилган. Шу орқали қурилма юзасида «ёруғлик тарқалиши ва бирлашувининг оптик эффектига эришилган».

Иккинчи модель — «ёруғликни ютиш эффектини ҳосил қилувчи» махсус оптик плёнкага эга ҳаворанг. Учинчи версия — эни бўйича камера блокига тенг қора тасмали сариқ модель. Охирги вариантдаги Realme GТ’нинг орқа қопқоғи чармдан ишланган.

Аппаратга пикселлари сони 2400х1080 га тенг 6,4 дюймли, янгиланиш частотаси 120 герцга тенг Super AMOLED экран ўрнатилган, бармоқ изи сканери ҳам дисплей юзасида жойлашган. Смартфондаги камералар сони тўртта: 64 мегапикселли асосий, 8 мегапикселли ултра кенг бурчак, 2 мегапикселли макро-объектив ва 16 мегапикселли фронтал камера. Телефон 4К форматда видеоларни ёзиб олишга қодир.

Realme GТ’нинг асосий ўзига хослиги янги қурилмалар ичига Snapdragon 888 процессори ўрнатилган. График тезлаштиргичи Адрено 660 бўлиб, унга 6 ёки 12 гигабайтли тезкор хотира ёрдам беради. Смартфонга VS Voost зангламайдиган пўлатдан тайёрланган совитиш тизими қўшилган — бу юқори иссиқлик тарқалиш коэффициентига эга енгил 3D буғ совитишининг янги авлоди ҳисобланади.

Ички хотираси — 128 ёки 256 Гб. Аккумулятори сиғими 4500 мА/соат бўлиб, 65 ваттли тезкор қувватланиш функциясига эга.

Янги смартфоннинг жаҳон бўйлаб савдолари 10 март куни бошланади. Realme GТ’нинг расмий нархи — 8/128 Гб версияси 428 доллар, 12/256 Гб версияси — 505 доллар.