Тошкент вилоятида жуда кўп миқдордаги дори воситаларининг ноқонуний муомалага киритилишининг олди олинди, дея хабар қилмоқда Бош прокуратура ҳузуридаги Департамент матбуот хизмати.
Маълум қилинишича, Тошкент туманида Бош прокуратура ҳузуридаги Департамент ҳамда Давлат божхона қўмитасининг Тошкент вилояти бошқармалари томонидан ҳамкорликда ўтказилган тезкор тадбирларда фуқаро Х.Н. ноқонуний даромад орттириш мақсадида 5000 дона «Гепарин» дори воситасини дорихона ва унинг филиалларидан ташқарида харидорга 20 000 АҚШ долларига ҳамда Янгийўл туманида фуқаро И.И. 8000 дона «HepaCare» номли дори воситасини 148,8 миллион сўмга сотаётган вақтида ашёвий далиллар билан ушланган.
Мазкур ҳолатлар юзасидан Х.Н. ва И.И.га нисбатан Жиноят кодексининг 186-3-моддаси (дори воситаларини дорихоналардан ва уларнинг филиалларидан ташқарида реализация қилиш) билан жиноят ишлари қўзғатилиб, тергов ҳаракатлари ўтказилмоқда.
Бундан аввал Наманганда ноқонуний равишда дори ишлаб чиқараётган яширин корхона аниқлангани, Жиззахда магистрал йўл бўйида COVID-19 вирусини аниқловчи тест ва бошқа тиббий буюмларни ноқонуний сотаётган шахс ушлангани ҳамда Тошкент вилоятида 200 қути «Ремдесивир» дорисини жами 170 миллион сўмга сотган шахс қўлга олингани ҳақида хабар берилганди.
Изоҳ (0)