Ижтимоий тармоқларда Наманган вилояти Давлатобод туманида тунги клубнинг беҳаё рекламаси акс этган видео тарқалди. Ҳолат юзасидан вилоят Ички ишлар бошқармаси баёнот берди.
Маълум қилинишича, Давлатобод туманида жойлашган «Rome» тунги клубининг Facebook’даги саҳифасига видеоролик жойланган. Видеода 13 март куни клубда шоу бўлиб ўтиши ҳақида яланғоч қизлар иштирокида беҳаё реклама акс этган.
Ҳолат юзасидан вилоят ИИБ томонидан суриштирув ўтказилганида ушбу видео «Rome» номли ресторанда олингани, бундан мақсад эса мижозларни ўзига жалб қилиш бўлгани аниқланган.
Ресторан иш юритувчиси вазифасида ишловчи Тошкент шаҳрида яшовчи 25 ёшли йигит ушбу ролик фақат реклама учун олингани, махсус шоу ўтказиладиган санада бундай ҳолга йўл қўйилмаслиги ҳақида изоҳ берган.
«Видеочиларни чақирдим. Улар ғоялар беришди. Биз унчалик бўлишини айтмаган эдик. Тасвирчиларнинг хатолиги билан видео озгина хунук тарзда чиқибди. Бунчалик оммалашиб кетишини билмаган эдик. Пушаймонмиз қилган ишимиздан. Узр сўраймиз», — дейди йигит.
Айни пайтда ҳолат юзасидан суриштирув ишлари давом этмоқда.
Бундан аввал Жиззахда 3 нафар аёлни фоҳишалик қилиш учун Туркияга жўнатаётган 21 ёшли йигит қўлга олингани, Тошкентда интим хизматлар кўрсатувчи спа-салонлар аниқлангани ҳақида Тошкентда Ўзбекистон ва чет эл фуқароларига шаҳвоний хизматлар кўрсатувчи йирик жиноий гуруҳ аниқлангани ҳақида хабар қилинганди.
Изоҳ (0)