Toshkent viloyatida juda ko‘p miqdordagi dori vositalarining noqonuniy muomalaga kiritilishining oldi olindi, deya xabar qilmoqda Bosh prokuratura huzuridagi Departament matbuot xizmati.
Ma’lum qilinishicha, Toshkent tumanida Bosh prokuratura huzuridagi Departament hamda Davlat bojxona qo‘mitasining Toshkent viloyati boshqarmalari tomonidan hamkorlikda o‘tkazilgan tezkor tadbirlarda fuqaro X.N. noqonuniy daromad orttirish maqsadida 5000 dona “Geparin” dori vositasini dorixona va uning filiallaridan tashqarida xaridorga 20 000 AQSh dollariga hamda Yangiyo‘l tumanida fuqaro I.I. 8000 dona “HepaCare” nomli dori vositasini 148,8 million so‘mga sotayotgan vaqtida ashyoviy dalillar bilan ushlangan.
Mazkur holatlar yuzasidan X.N. va I.I.ga nisbatan Jinoyat kodeksining 186-3-moddasi (dori vositalarini dorixonalardan va ularning filiallaridan tashqarida realizatsiya qilish) bilan jinoyat ishlari qo‘zg‘atilib, tergov harakatlari o‘tkazilmoqda.
Bundan avval Namanganda noqonuniy ravishda dori ishlab chiqarayotgan yashirin korxona aniqlangani, Jizzaxda magistral yo‘l bo‘yida COVID-19 virusini aniqlovchi test va boshqa tibbiy buyumlarni noqonuniy sotayotgan shaxs ushlangani hamda Toshkent viloyatida 200 quti “Remdesivir” dorisini jami 170 million so‘mga sotgan shaxs qo‘lga olingani haqida xabar berilgandi.
Izoh (0)