Namanganda noqonuniy ravishda dori ishlab chiqarayotgan yashirin korxona aniqlandi
Namangan viloyati Davlatobod tumanida qalbaki dori vositalarini ishlab chiqarayotgan yashirin sex faoliyatiga chek qo‘yildi, deya xabar bermoqda Bosh prokuratura huzuridagi Departament matbuot xizmati.
Qayd etilishicha, Bosh prokuratura huzuridagi Departament hamda IIBning Davlatobod tumani bo‘limlari tomonidan tezkor tadbir o‘tkazilgan.
Unda fuqaro R.A. va boshqalar “Elxon” MFY hududidagi uyida elektr tarmog‘iga o‘zboshimchalik bilan ulanib, qalbaki dori vositalarini (“Menovazin”, etil spirti, yod va yashil eritma) ishlab chiqarish faoliyati bilan shug‘ullanib kelayotganligi aniqlangan.
Ashyoviy dalil sifatida umumiy qiymati 432,2 million so‘mlik dori vositalari, turli xil yorliq, kukun va uskunalar olingan.
Mazkur holat yuzasidan R.A. va boshqalarga nisbatan Jinoyat kodeksining 186-3-moddasi 3-qismi (ko‘p miqdorda sifatsiz yoki qalbakilashtirilgan dori vositalarini yoxud tibbiy buyumlarni o‘tkazish maqsadida ishlab chiqarish, tayyorlash, olish, saqlash, tashish yoki o‘tkazish) bilan jinoyat ishi qo‘zg‘atilib, tergov harakatlari o‘tkazilmoqda.
Bundan avval Jizzaxda magistral yo‘l bo‘yida COVID-19 virusini aniqlovchi test va boshqa tibbiy buyumlarni noqonuniy sotayotgan shaxs ushlangani, Toshkent viloyatida 200 quti “Remdesivir” dorisini jami 170 million so‘mga sotgan shaxs qo‘lga olingani hamda Zangiotada qalbaki Persil, Ariel, Mif, Tide kir yuvish kukunlari ishlab chiqarayotgan sex fosh etilgani haqida xabar berilgandi.
