Sirdaryoda vagondan yarim tayyor teri mahsulotlarini o‘g‘irlagan bekobodlik shaxslar qo‘lga olindi

Sirdaryoda poyezd platformasi ustiga ortilgan konteynerdan yarim tayyor teri mahsulotlarini o‘g‘irlagan shaxslar ushlandi, deb xabar beradi IIV Transportda xavfsizlikni ta’minlash bosh boshqarmasi.

Ma’lum qilinishicha, 3-mart kuni Sirdaryo viloyati IIB TXTBga Yangiyer temiryo‘l bekati navbatchisi Yangiyer temiryo‘l bekatidan o‘tayotgan 3001-sonli yuk poyezdi tarkibidagi platforma ustiga ortilgan konteynerning eshigi ochiqligi haqida xabar bergan.

Tergovga qadar tekshiruv harakatlari davomida Bekobod—Chuqursoy yo‘nalishidagi 3001-sonli yuk poyezdi tarkibida 36-o‘rinda turgan platforma ustiga ortilgan konteyner Guliston temiryo‘l bekatida TXTB xodimlari va yuk qabul qilib topshiruvchilari bilan birgalikda tekshirib ko‘rilgan. Tekshiruv davomida konteynerning plombasi yo‘qligi natijasida ushbu konteynerning bir tabaqa eshigi ochiq holatda turgani, vagon hujjatlariga ko‘ra, 770 dona qop yarim tayyor teri mahsuloti ortilganligi va ularda kamomad aniqlangan.

Holat yuzasidan 6-mart kuni TXTB xodimlari tomonidan olib borilgan tezkor qidiruv ishlari natijasida ushbu o‘g‘irlikni Bekobod—Xovos peregoni 30-31 kilometr oralig‘ida to‘rt nafar bekobodlik fuqaro sodir etganligi aniqlangan.

Ulardan 16 ta qop yarim tayyor teri mahsuloti daliliy ashyo tariqasida olingan va konteynerga komissiya a’zolari ishtirokida yuklanib, kamomad bartaraf etilgani haqida dalolatnoma tuzilgan. Hozirda surishtiruv ishlari davom etmoqda.

Avvalroq Angrenda besh kishi harakatlanayotgan vagondan ko‘mir o‘g‘irlamoqchi bo‘lgani to‘g‘risida xabar berilgandi.