Toshkent viloyatida besh nafar noma’lum shaxs yurib ketayotgan teplovozdan ko‘mir o‘g‘irlamoqchi bo‘ldi. Bu haqda “O‘zbekiston temir yo‘llari” matbuot xizmati xabar berdi.
Foto: “O‘zbekiston temir yo‘llari” matbuot xizmati
Qayd etilishicha, 17-noyabr kuni Olmaliq kon metallurgiya kombinatining Angren shahridagi filialiga tegishli ko‘mir ortilgan 50 vagonli yuk poyezdi to‘rttasini uzib qoldirish uchun “Obliq” temiryo‘l bekatida to‘xtagan. Uzib qolingan vagonlar belgilangan manzilga olib borish uchun teplovozga ulangan. Yuk poyezdi harakatlangan vaqtda 5 nafar noma’lum shaxs vagonga osilib, ko‘mir mahsulotini talon-toroj qilishga uringan.
Ushbu yuk poezdiga hamrohlik qilgan “O‘zbekiston temir yo‘llari” harbiylashtirilgan qo‘riqlash otryadi xodimi zudlik bilan teplovozni to‘xtatib, talonchilarni ushlashga harakat qilgan. Biroq ular tarqalib, jinoyat joyidan qochishga muvaffaq bo‘lgan.
Hozirda mazkur noma’lum shaxslarni aniqlash, kelgusida ularning ushbu noqonuniy harakatiga qonuniy baho berish yuzasidan tezkor surishtiruv tadbirlari olib borilmoqda.
Avvalroq Angrenda 25 yoshli yigit yuk poyezdiga ortilgan ko‘mirdan qariyb 1 tonna o‘g‘irlagani aniqlangani haqida xabar berilgan edi.
