Қашқадарёда қурилиш талабларини бузган ва қурилаётган объектни экспертизадан ўтказмаган компанияларга нисбатан чора кўрилмоқда, дея хабар бермоқда Қурилиш вазирлиги.
Маълум қилинишича, Қарши шаҳри «Шўртан» МФЙ ҳудудидаги «1-сон комплекс лойиҳа қурилиш ва монтаж» хусусий корхонаси томонидан қурилаётган кўп қаватли турар жой биноси ўрганилганда «Қурилишда ишлаб чиқаришни ташкил қилиш» талабларига асосан объектда мажбурий юритилиши лозим бўлган ижро ҳужжатлари юритилмагани, бинода ишлатилган монолит темир бетон конструкцияларининг лойиҳавий мустаҳкамлигига мос келиши бўйича лаборатория синов хулосалари олинмагани аниқланган.
Шунингдек, Вазирлар Маҳкамасининг 2018 йил 18 майдаги 370-сонли қарори билан тасдиқланган низом талаблари, яъни шаҳарсозликка рухсат берувчи ҳужжатлар расмийлаштирилмагани ҳамда 5-иловасига асосан ҳудудий инспекцияни хабардор этмасдан қурилиш-монтаж ишлари бошлангани маълум бўлган.
Ушбу аниқланган камчиликлар бўйича пудратчи ташкилотга нисбатан 2020 йил 24 декабрдаги 1154-сонли ёзма кўрсатма берилиб, камчиликлар бартараф этилмагани сабабли маъмурий ҳуқуқбузарлик тўғрисида баённома расмийлаштирилиб, тегишли судга топширилган.
Бундан ташқари, Қарши шаҳрининг Ислом Каримов ҳамда Тупхона кўчаси чорраҳасида «Улкан иншоот қурилиш сервис» МЧЖ томонидан қурилаётган меҳмонхона биносида ўрганиш олиб борилганда қурилаётган бинода ҳам юқоридаги камчиликлар аниқланган. Маълум бўлишича, қурилаётган объектда ишлатилаётган қурилиш материалларининг сифат ҳужжатлари мавжуд эмас, темир бетон конструкцияларида ишлатилган бетон қоришмаларининг лойиҳавий мустаҳкамлигига мослиги бўйича лаборатория синов хулосалари олинмаган.
Мазкур аниқланган камчиликлар ҳудудий инспекция томонидан 1136-сонли ёзма кўрсатмада белгиланган муддатда бажарилмагани сабабли маъмурий ҳуқуқбузарлик тўғрисида баённома расмийлаштирилиб, тегишли судга юборилган.
Шунингдек, Қарши шаҳрининг Жайхун кўчаси ҳудудида «Назира» хусусий корхонаси томонидан қурилаётган «Автомобильларга техник хизмат кўрсатиш шохобчалари ва навес» қурилиши ҳудудий инспекцияни хабардор этмасдан бошлангани сабабли объектда инспекциянинг 181-сонли ишлаб чиқариш буйруғига асосан қисқа муддатли инспекторлик текшируви ўтказилган.
Объектда «Қурилишда ишлаб чиқаришни ташкил қилиш» қоидасининг 7.2-банди талабига зид равишда қурилиш пойдеворининг тупроқости зичлигини аниқлаш бўйича лаборатория синов хулосалари олинмагани, ишлаб чиқилган ишчи лойиҳада «навес» қурилиши ишларида устунларга D150 миллиметрли металл қувурлар, том ёпма ишларида металл фермалар кўрсатилган бўлиб, амалда ҚМҚ 2.01.03-96 «Зилзилавий ҳудудларда қурилиш» қоидаси ва лойиҳа талабида зид равишда устунлар ўрнига олдин фойдаланилган йиғма темир бетон устунлар ва колонналар монтаж қилингани аниқланган.
Аниқланган камчилик ва нуқсонлар бўйича пудрат ташкилот «Назира» хусусий корхонаси раҳбари номига 980-сонли ёзма кўрсатма берилган бўлиб, белгиланган муддатда бажарилмагани сабабли маъмурий ҳуқуқбузарлик тўғрисида баённома тузилиб, тегишли суд органига юборилган.
Қамаши туманининг «Оқгузар» МФЙ ҳудудида эса «Замин метан сервис» МЧЖ томонидан қурилаётган 2 қаватли супермаркет биноси қурилиши ҳудудий инспекцияни хабардор этмасдан бошлангани сабабли объектда инспекциянинг 8-сонли ишлаб чиқариш буйруғига асосан, қисқа муддатли инспекторлик текшируви ўтказилган.
Қисқа муддатли инспекторлик текшируви жараёнида объектда қурилишида ишлатилган монолит темир бетон конструкцияларининг мустаҳкамлилиги лойиҳага мослиги бўйича лаборатория синов хулосалари олинмагани аниқланган ва бу камчиликларни бартараф этиш бўйича тегишли кўрсатмалар берилган.
Бундан аввал Тошкент вилоятида 3 та кўп қаватли уй, савдо мажмуаси ва божхона терминали ноқонуний равишда қурилаётгани аниқлангани, Фарғонада кўп қаватли уйлар орасидаги қурилишлар нега тўхтатилганига изоҳ берилгани ҳамда Жиззахда қурилиш талабларини бузган бир қанча компанияларга чора кўрилгани тўғрисида хабар берилганди.
Изоҳ (0)