Олий Мажлис Қонунчилик палатаси спикери ўринбосари, «Миллий тикланиш» демократик партияси фракцияси раҳбари Алишер Қодиров Бухоро давлат университетига ташрифи чоғида талаба олий таълимга фақат билим олиш учун келиши кераклигини айтди. Бу ҳақда Қонунчилик палатаси матбуот хизмати хабар берди.
«Олий таълим тарбия маскани эмас, бу жараёндан узилиши керак. Талаба олийгоҳга фақат билим олиши учун келиши лозим. Яъни олий таълимда фақат етук мутахассис тайёрланадиган муҳит яратилиши керак», — дея таъкидлаган Алишер Қодиров.
Эслатиб ўтамиз, 2021 йилнинг февраль бошларида олий таълим вазири Абдуқодир Тошқулов олий таълим муассасалари ислоҳ қилиниши, бунинг учун эса уч ой вақт кераклигини маълум қилганди. «Умуман олий таълим муассасасида нима ёқмаган бўлса ҳаммаси ислоҳ бўлади», — деган эди у.
Аввалроқ Тошкентнинг Юнусобод туманида беш нафар талаба ўлик ҳолда топилгани, улардан бири Инҳа университетининг 1-босқич талабаси эканлиги тўғрисида хабар берилган эди. Фожиадан сўнг ижарада яшаётган талабаларнинг шароитлари ўрганиладиган бўлди.
Олий Мажлис Қонунчилик палатасида 2 март куни ўтказилган «Ҳукумат соати»да олий ва ўрта махсус таълим вазири Абдуқодир Тошқулов талабаларнинг ётоқхоналарга бўлган эҳтиёжи ҳақида сўз юритиб, ҳозирда республикада мавжуд 228 та талабалар турар жойида 58 минг нафар талаба истиқомат қилаётганини маълум қилганди.
Изоҳ (0)