Вазирлар Маҳкамасининг тегишли фармойишига биноан, Наврўз умумхалқ байрамини муносиб нишонлашга тайёргарлик кўриш, шунингдек, маҳаллалар, аҳоли турар жойларини ободонлаштириш ва кўкаламзорлаштириш мақсадида 13 март куни Ўзбекистоннинг барча ҳудудларида «Обод ва кўркам маҳаллам» ободонлаштириш ва кўкаламзорлаштириш умумхалқ хайрия ҳашарини ўтказиш белгиланди, деб хабар беради ЎзА.
Умумхалқ хайрия ҳашарини ўтказиш бўйича бош вазирнинг биринчи ўринбосари Очилбой Раматов раҳбарлигида ишчи гуруҳ таркиби тасдиқланган.
Хайрия ҳашарини ўтказишда қуйидагиларга эътибор қаратиш алоҳида қайд этилди:
- маҳаллалар, аҳоли пунктлари, кўп қаватли бинолар ва ҳовлилар атрофи, гузарлар, хиёбонлар, зиёратгоҳлар, қабристонларни ҳамда болалар майдончаларини тартибга келтириш;
- «Маҳалламга 30 туп дарахт менинг туҳфам» шиори остида барча турар жой мавзелари ва маҳаллаларда гул кўчатлари, мевали ва манзарали дарахтлар экиш, дарахтларни оқлаш ва буташ;
- умумхалқ ҳашари доирасида бўлмаган бошқа турдаги жамоат ишлари, шу жумладан, қурилиш-таъмирлаш ва қишлоқ хўжалиги ишларига мажбурий жалб этишга қатъий йўл қўйилмаган ҳолда ободонлаштириш, кўкаламзорлаштириш, иш ўринларини тартибга келтириш ишларини амалга ошириш.
Ушбу тарғибот-ташвиқот тадбирларида жойларда иш берувчилар томонидан ҳашарда кўзда тутилган ишлар учун ишчиларни мажбурий тарзда жалб этишга мутлақо йўл қўймайди, шундай ҳолатларга йўл қўйган мутасаддиларга жазо чораларини қўлланилади.
Изоҳ (0)