Италия президенти Сержо Маттарелла Lazzaro Spallanzani номли Рим Миллий юқумли касалликлар институтида коронавирусга қарши эмланди. Бу ҳақда Квиринал саройига таяниб «РИА Новости» хабар берди.
Таъкидланишича, давлат раҳбари 1941 йилда ва ундан олдин туғилганлар учун эмлаш кампанияси доирасида препаратнинг биринчи дозасини олди. Июль ойида 80 ёшга тўлган Маттарелла ўзининг янги йил хабарномасида эмлаш «мажбурий ва масъулиятли танлов» эканини айтган эди. Кейин у яқин вақт ичида энг заиф гуруҳдаги фуқаролар эмланганидан кейин вакцина олишни ваъда берган эди.
Маҳаллий ОАВ хабарига кўра, Маттарелла Moderna компаниясининг «ўз ёшидаги беморларга мўлжалланган» вакцинаси билан эмланди.
Италия ҳукумати кузгача аҳолининг 70 фоизини эмлаб, оммавий иммунитетни шакллантиришни мақсад қилиб қўйган. Италия Соғлиқни сақлаш вазирлиги маълумотларига кўра, 9 март куни мамлакатда 5,5 миллион дозада коронавирусга қарши вакцина тарқатилди. Тахминан, 1,7 миллион киши коронавирусга қарши вакцинациянинг иккала инъекциясини ҳам олди. Февраль ойининг охиридан бошлаб вакцинация сурати тезлашди, 8 март куни 150 минг италиялик вирусга қарши эмланди.
Аввалроқ Италияда коронавируснинг «нигерияча» штамми аниқлангани ҳақида хабар берилганди.
Изоҳ (0)