Давлат бошқарувидаги эркаклар ва аёллар улуши 130 йил ичида тенглашиши мумкин. Бу ҳақда БМТ Хавфсизлик Кенгашининг норасмий йиғилишида БМТ бош котибининг сиёсий масалалар бўйича ўринбосари Розамарий ДиКарло айтиб ўтди, деб ёзади «РБК».
«Ҳозирги тараққиёт даражасида давлат ва ҳукумат раҳбарлари даражасидаги гендер тенглигига эришиш яна 130 йил вақт олади», — деди ДиКарло.
Унинг сўзларига кўра, БМТ ўз ходимлари ўртасида гендер тенглигини таъминлашга интилади. ДиКарлонинг айтишича, ташкилотнинг бош котиби Антониу Гутерриш БМТ махсус сиёсий миссияларидаги раҳбарлик лавозимларининг 57 фоиздан кўпроғига аёлларни тайинлаган, шу жумладан, Афғонистон ва Ироқдаги миссиялар раҳбарлари ҳам аёллардир.
Аввалроқ Гутерриш 22 мамлакатда аёллар давлат ёки ҳукумат раҳбари эканини маълум қилган эди. «Шу билан бирга, парламент депутатлари орасида аёллар 25 фоизидан камроқни ташкил қилади», — деди ДиКарло.
Январь ойида Romir компанияси ва GlobalNR тадқиқот компаниялари халқаро ҳамжамияти етакчи аёллар сонини кўпайтириш ғоясига салбий қарайдиганлар бошқа мамлакатлар билан таққослаганда Россияда кўпроқ эканини аниқлади.
Тадқиқот Бразилия, Буюк Британия, Германия, Ҳиндистон, Италия, Россия, АҚШ, Таиланд, Жанубий Корея ва Хитойда ўтказилган. Унда 7,1 мингдан ортиқ киши иштирок этган. Россияликларнинг 7 фоиздан кўпроғи аёллар етакчи бўлиши керак, деган фикрга мутлақо қўшилмайди. Учта давлатда — АҚШ, Германия ва Кореяда бу кўрсаткич 3 фоизни, қолганларида эса 1-2 фоизни ташкил этган.
Изоҳ (0)