Буюк Британия қироличаси Елизавета II шаҳзода Гарри ва унинг рафиқаси Меган Марклнинг америкалик журналист Опра Уинфрига берган интервьюсига оид қироллик оиласи матбуот хизмати томонидан тайёрланган баёнотга имзо чекмади. Бу ҳақда The Times нашрига таяниб, «РБК» хабар берди.
Қироличанинг баёноти Британия жамиятида кечаётган тарангликни юмшатиши керак эди. Газетада ёзилишича, Елизавета II эр-хотиннинг баёнотларига жавоб қайтариш учун бироз танаффус олган.
The Times газетасининг ёзишича, Букингем саройидаги интервьюдан сўнг Меган Марклнинг ўз жонига қасд қилиш ўйлари, қироллик оиласидаги ирқчилик ва оила вакиллари ўртасидаги муносабатларнинг мураккаблиги ҳақида айтган гаплари шов-шувга сабаб бўлди.
Суҳбат Американинг CBS телеканалида 7 март куни намойиш этилган. Қироллик ваколатларидан расман воз кечганига бир йил бўлган ушбу жуфтлик интервью мобайнида бир қатор эътиборга молик баёнотлар берди ва бошқа масалалар қаторида Британия монархиясининг парда ортидаги ҳаётидан баъзи жиҳатларни очиб берди.
Маркл Букингем саройининг матбуот идораси уни ҳатто ўз жонига қасд қилиш ҳақидаги ўйлари ва қироллик оиласи эр-хотиннинг биринчи фарзанди Арчининг териси «қанчалик қора» бўлиши (Меганнинг онаси афроамерикалик) ҳақида ташвишлангани тўғрисида жамоатчиликка ошкор қилишга йўл қўймаганини тан олди.
Герцогиня, шунингдек, шаҳзода Гаррига расмий тўй маросимидан уч кун олдин хуфиёна турмушга чиққани ва ёзда туғиладиган иккинчи фарзанди қиз бўлиши кутилаётганини айтди.
Гаррининг сўзларига кўра, қироллик ваколатларидан воз кечиш тўғрисида қарор қабул қилингандан сўнг у отаси шаҳзода Чарльз билан маълум вақт алоқаларни тўхтатган, аммо бувиси Елизавета II билан яхши муносабатларни сақлаб қолган.
Суҳбатдан сўнг Уинфрининг маълум қилишича, кадр ортида шаҳзода Гарри ўғлининг териси ранги мавзуси тўғридан-тўғри қиролича ёки унинг эри, шаҳзода Филипп томонидан муҳокама қилинмаганини таъкидлаган.
Интервью эфирга чиқарилишидан бир неча соат олдин The Times нашри манбаларига асосланиб Букингем саройи томонидан ушбу интервьюга қирол оиласига нисбатан «уруш эълон қилиш» сифатида қаралишини ёзди. «Реакция кимнинг танқид қилинишига боғлиқ бўлади — қирол оиласими ёки муайян шахслар?», — деган газета манбаси.
YouGov жамияцҳунослик компаниясининг маълумотларига кўра, британияликларнинг 47 фоизи суҳбатни ноўрин деб атаган, респондентларнинг 21 фоизи эса бунга тескари нуқтаи назарни билдирган ва яна 31 фоизи интервью тўғрисида қарор қабул қила олмаган. Сўровда қатнашганларнинг 29 фоизи Сассекс герцоги ва герцогинясига, 39 фоизи қироллик оиласига ҳамдардлик билдирган.
Аввалроқ Британия қироллик оиласининг хизматчилари шаҳзода Гаррининг рафиқаси Меган Марклни тазйиқ ўтказиш ва таҳқирлашда айблаган эди. Унга жавобан Маркл бундай «ҳужум»дан «хафа бўлганини» маълум қилган.
Изоҳ (0)