Арманистон ҳукумати мамлакатда Бирлашган Миллатлар Ташкилотининг Болалар жамғармаси (ЮНИСЕФ) вакили Марин Кларк-Хаттингнинг фаолиятини муаммоли деб топиб, уни ваколатларидан маҳрум қилди. Бу ҳақда Арманистон Ташқи ишлар вазирлиги матбуот котиби Анна Нагдалян маълум қилди, деб ёзади «РБК». Шу билан бирга, ОАВ Марине Кларк-Хаттинг жосусликда айбланиб, persona non grata деб эълон қилингани ҳақида хабар қилган.
«Арманистонда расмийлар Бирлашган Миллатлар Ташкилотининг Болалар жамғармаси (ЮНИСЕФ) вакили Марин Кларк-Хаттингнинг фаолиятини мамлакат учун муаммоли деб ҳисоблаб, унинг ваколатларини тўхтатди. ЮНИСЕФнинг Арманистондаги вакили Марин Кларк-Хаттингнинг иш услубиятидаги ҳамкорлик ўрнатишга ҳеч қандай ҳисса қўшмайдиган умумий камчиликлар Арманистон учун ўта муаммоли эди, шунинг учун Арманистон ҳукумати Кларк-Хаттингнинг фаолиятини тўхтатишга қарор қилди», — деди Нагдалян.
Матбуот котибининг таъкидлашича, Арманистон мазкур қарор тўғрисида БМТнинг доимий координатори ва ЮНИСЕФ вакилларини хабардор қилган.
«Спутник Армания» хабарига кўра, айни пайтда Кларк-Хаттинг мамлакатни тарк этган.
Шунингдек, Медиапорт Telegram-канали ЮНИСЕФ вакилининг Арманистонда Озарбайжон ва Буюк Британия фойдасига жосуслик қилгани учун persona non grata деб эълон қилингани ҳақида хабар берган. Хабарга кўра, гўёки расмийлар ушбу фактни жамоатчиликдан яширишни истаган
Кларк-Хаттинг 2020 йил июлида Арманистондаги ЮНИСЕФ вакили этиб тайинланган эди. У Арманистонда саккиз ой фаолият юритди. Бунгача у ЮНИСЕФнинг Малайзиядаги вакили бўлиб ишлаган.
Маълумот учун ЮНИСЕФ — БМТ ҳомийлигида болалар ва оналик масалаларига бағишланган халқаро ташкилот. Ташкилотнинг асосий мақсадлари болалар орасида ўлимни камайтириш ва таълим даражасини оширишдир.
Аввалроқ Арманистонда бош вазир Никол Пашинянга қарши намойишлардан кейин полиция президент қароргоҳини қатъий қўриқлов остига олгани ҳақида хабар берилганди. 6 март, шанба куни Арманистон бош вазири Никол Пашинянга қарши бўлганлар яна норозилик акциясини уюштирган: улар Ереван марказига чиқиб, бош вазирнинг истеъфосини талаб қилган.
Эслатиб ўтамиз, 23 февраль куни Арманистон бош вазири 1ин.ам каналига берган интервьюсида 2020 йилнинг кузида Тоғли Қорабоғдаги можаро пайтида Ереван қўллаган «Искандер» ракеталари «портламаган ёки 10 фоиз қисмигина портлаган»ини айтган. Yerevan Today нашри журналистлари Арманистон Қуролли Кучлари бош штаби бошлиғининг биринчи ўринбосари Тиран Хачатряндан ушбу баёнотга изоҳ беришни сўраганида, у узоқ кулган ва «бўлиши мумкин эмас» деб жавоб берган. Шундан кейин у Никол Пашиняннинг таклифига биноан ишдан бўшатилган.Бу воқеадан кейин Арманистон Қуролли Кучлари бош штаби мамлакат бош вазири Никол Пашинян ва ҳукуматнинг зудлик билан истеъфога чиқишини талаб қилди. Баёнотга имзо чеккан 40 нафар юқори мартабали ҳарбий хизматчининг фикрича, Хачатрян «юзаки ўйланган ва асоссиз сабабларга кўра» ишдан бўшатилган.
Изоҳ (0)