Italiya prezidenti Serjo Mattarella Lazzaro Spallanzani nomli Rim Milliy yuqumli kasalliklar institutida koronavirusga qarshi emlandi. Bu haqda Kvirinal saroyiga tayanib “RIA Novosti” xabar berdi.
Ta’kidlanishicha, davlat rahbari 1941-yilda va undan oldin tug‘ilganlar uchun emlash kampaniyasi doirasida preparatning birinchi dozasini oldi. Iyul oyida 80 yoshga to‘lgan Mattarella o‘zining yangi yil xabarnomasida emlash “majburiy va mas’uliyatli tanlov” ekanini aytgan edi. Keyin u yaqin vaqt ichida eng zaif guruhdagi fuqarolar emlanganidan keyin vaksina olishni va’da bergan edi.
Mahalliy OAV xabariga ko‘ra, Mattarella Moderna kompaniyasining “o‘z yoshidagi bemorlarga mo‘ljallangan” vaksinasi bilan emlandi.
Italiya hukumati kuzgacha aholining 70 foizini emlab, ommaviy immunitetni shakllantirishni maqsad qilib qo‘ygan. Italiya Sog‘liqni saqlash vazirligi ma’lumotlariga ko‘ra, 9-mart kuni mamlakatda 5,5 million dozada koronavirusga qarshi vaksina tarqatildi. Taxminan, 1,7 million kishi koronavirusga qarshi vaksinatsiyaning ikkala inyeksiyasini ham oldi. Fevral oyining oxiridan boshlab vaksinatsiya surati tezlashdi, 8-mart kuni 150 ming italiyalik virusga qarshi emlandi.
Avvalroq Italiyada koronavirusning “nigeriyacha” shtammi aniqlangani haqida xabar berilgandi.
Izoh (0)