Андижон вилояти Булоқбоши тумани қурилиш бўлими мутахассиси 6 сотих ерни турар жой тоифасига ўзгартириб бериш эвазига 500 доллар миқдорида пора олаётганида ушланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти маълум қилди.
Маълум қилинишича, департаментнинг Булоқбоши туман бўлими томонидан тезкор тадбир ўтказилган. Тадбир давомида туман қурилиш бўлими мутахассиси З.У. фуқаро Т.С.га савдо ва маиший хизмат кўрсатиш шохобчаси қуриш учун ажратилган 8 сотих ер майдонининг 6 сотихини юқори лавозимда ишловчи танишлари орқали турар жой тоифасига ўзгартириб беришни ваъда қилган. Бунинг эвазига у 500 АҚШ долларини фирибгарлик йўли билан олган вақтида ашёвий далиллар билан ушланган.
Мазкур ҳолат юзасидан З.У.га нисбатан Жиноят кодексининг 168-моддаси (фирибгарлик) ва 28,211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.
Аввалроқ Бўстонлиқда ўзганинг 15 сотих ерини 33 минг долларга сотишга уринган шахслар қўлга олингани, Чинозда тадбиркорга 12 800 доллар эвазига 1,3 гектар ер ажратиб беришни ваъда қилган туман ҳокимлиги ходими ушлангани, Тошкент вилоятида ҳоким қарорини сохталаштириб, аслида йўқ бўлган уйларни 100 минг долларга сотишга уринган шахслар қўлга олингани тўғрисида хабар берилганди.
Изоҳ (0)