Сергели, Бектемир ва Миробод туманларидаги айрим маҳалла ва мавзеларда газ таъминоти вақтинча ўчирилади

9 март куни Тошкентнинг Сергели, Бектемир ва Миробод туманларидаги айрим маҳалла ва мавзеларда газ таъминоти таъмирлаш ишлари сабаб вақтинча ўчирилади. Бу ҳақда «Ҳудудгаз пойтахт» матбуот хизмати хабар берди.

Маълум қилинишича, Сергели туманининг «Қумариқ» маҳалласидаги 1930 та ерли хонадон ва Қурувчилар мавзесидаги 39 та кўп қаватли уйлардаги аҳоли (4000 та хонадон) соат 09:00 дан 18:00 гача табиий газ таъминотидан вақтинчалик узилади.

Бундан ташқари, соат 09:00—18:00 оралиғида Бектемир ва Миробод туманларининг Баратхўжа, Қўйлиқ ва Бадахшох кўчаларидаги 550 та ерли хонадон ҳамда «Delta bisnes» AGNKS-3, «Автоёқилғи савдо бизнес» АГТКШ, «ABZ» асфальт заводи, GM заводи, шунингдек, барча йирик корхона ва ташкилотлар, улгуржи истеъмолчилар табиий газ таъминотидан вақтинчалик тўхтатилади.

«Таъмирлаш ишлари тугатилгандан сўнг, табиий газ таъминоти қайта тикланади», — дейилади хабарда.

Аввалроқ Тошкент вилоятида ўчиб қолган газ ҳисоблагичларни ўрнатиш вақтида далолатномалар нотўғри расмийлаштирилгани тўғрисида хабар берилганди.