Хитой Россия билан биргаликда «сиёсий вирус»га қарши курашаётганини маълум қилди

Хитой Халқ Республикаси ташқи ишлар вазири Ван И коронавирус пандемияси фонида дунёда «сиёсий вирус» ҳам тарқалаётганини маълум қилди, деб ёзади «Коммерсантъ».

Хитой ташқи ишлар вазири сўзларига кўра, Хитой ва Россия кучларини бирлаштириб, елкама-елка турган ҳолда унинг тарқалишига қарши курашмоқда. АҚШ эса бошқа мамлакатларнинг ички ишларига «доимий равишда сурбетларча аралашмоқда».

«Хитой ва Россия ҳаракатларини бирлаштириб, пандемия фонида сиёсий вирус тарқалишига қарши елкама-елка курашмоқда… Биз воқеликни қалбакилаштириш бўйича ҳар қандай уринишларга биргаликда курашамиз, ўз суверенитетимизни ва сиёсий барқарорлигимизни ҳимоя қиламиз», — деди Ван И Пекинда бўлиб ўтаётган мамлакат олий қонунчилик ва кенгаш берувчи органлар сессиясидаги матбуот анжуманида. Вазирнинг қўшимча қилишича, Пекин ва Москва рангли инқилобларга қарши чиқади.

АҚШнинг бошқа мамлакатлар ички ишларига аралашувини Ван И дунёдаги кўп сонли муаммолар манбаи деб атади. «Узоқ вақтлардан буён АҚШ демократия ва инсон ҳуқуқларини ҳимоя қилиш баҳонасида бошқа мамлакатларнинг ички ишларига сурбетлик билан аралашиб келади. Бу дунёда кўп сонли муаммоларни келтириб чиқаради, баъзи ҳолларда эса турбулентликка ва зиддиятларга олиб келади», — деди у.

Аввалроқ АҚШ президенти Жо Байденнинг маъмурияти армияни Россия ва Хитой томонидан келадиган таҳдидларга самарали қарши туриши учун қайта ташкил этиш ва модернизация қилишга тайёрлиги маълум қилинган эди. «Ўз кучига тобора кўпроқ ишонаётган Хитой ва беқарорлаштирувчи рол ўйнайдиган Россия билан стратегик рақобатни ҳисобга олган ҳолда, биз ўз кучларимиз учун энг мос тузилмани, имкониятларни ва сонни аниқлаймиз», — дейилганди Оқ уй сайтида эълон қилинган миллий хавфсизлик бўйича стратегияда.

Шу билан бирга, Қўшма Штатлар дунёда демократияни зўравонлик билан тарғиб қилиш сиёсатидан воз кечишини маълум қилди. «Биз демократияни охири қимматга тушадиган ҳарбий операциялар орқали ўрнатмаймиз. Бундан ташқари, Қўшма Штатлар авторитар тузумларни куч билан ағдаришга қаратилган уринишларидан воз кечади», — деди АҚШ давлат котиби Энтони Блинкен. Ташқи сиёсат бўлими бошлиғининг сўзларига кўра, илгари Вашингтон томонидан амалга оширилган бундай уринишлар эзгу мақсадларни кўзлаганига қарамай кутилган натижаларни бермаган.