АҚШ Конгресси Сенати коронавирус пандемиясидан жабр кўрган миллий иқтисодиётга ёрдам чоралари пакетини маъқуллади, деб ёзади «РБК». Иқтисодиётни кучайтиришга 1,9 триллион доллар йўналтирилади, режа президент Жо Байден томонидан таклиф қилинган дастурга асосланган.
Қонун лойиҳасини 50 сенатор қўллаб-қувватлади, 49 нафари қарши чиқди. Шу билан бирга, юқори палатадаги барча республикачилар ушбу чораларга қарши овоз берди, барча демократлар эса уларни ёқлади. Бир нафар республикачи сенатор овоз беришга келмаган. Энди ҳужжат вакиллар палатасига юборилади, у ерда маъқуллангач, имзолаш учун Байденга йўналтирилади. Демократлар қонун лойиҳаси 14 мартгача қабул қилинишини кутмоқда.
АҚШ президенти Жо Байден Сенатнинг ушбу қонун лойиҳасини маъқуллаш қарорини қўллаб-қувватлади. Унинг айтишича, ҳужжат март ойиданоқ америкаликларга бир марталик тўловлар тўлашни бошлаш имкониятини беради.
Унинг аниқлик киритишича, АҚШда уй хўжаликларининг 85 фоиздан ортиғи киши бошига 1,4 минг доллардан олади. Ишлаётган ота-она, икки фарзанд ва 100 минг доллар йиллик даромади бўлган ўртача оила учун тўлов миқдори 5,6 минг долларни ташкил қилади, деди у.
Байден АҚШ иқтисодиётини кучайтиришга қаратилган 1,9 триллион долларлик чоралар пакетини январь ўрталарида, ҳали президент лавозимига киришишидан аввалроқ тақдим этган эди.
Режа қуйидагиларни ўз ичига олади:
- пандемияга қарши кураш ва вакцинацияга 415 миллиард доллар;
- уй хўжаликларга тўғридаги тўғри ёрдам учун 1 триллион доллар;
- пандемияда энг кўп жабр кўрган кичик бизнес ташкилотларини қўллаб-қувватлашга 440 миллиард доллар.
Бунга қадар маъқулланган 600 долларга қўшимча равишда солиқ тўловчиларга 1,4 минг доллардан тўлаш таклиф этилмоқда. Шундай қилиб, декабрь—январь ойларидаги тўғридан-тўғри тўловлар 2 минг долларни ташкил этади, пандемия бошидан буён — 3,2 минг доллар. Ишсизлик учун тўланадиган қўшимча суғурта пуллар ҳафтасига 300 доллардан 400 долларга оширилади.
АҚШ Савдо вазирлигининг иқтисодий таҳлил бюроси маълумотларига кўра, 2020 йилда мамлакат ЯИМ 3,5 фоизга тушиб кетган, бу Иккинчи жаҳон уруши давридан буён кузатилган энг ёмон кўрсаткичдир. 1946 йилда пасайиш 11,6 фоизга тенг бўлган. Федерал захира тизими раҳбари Жером Пауэлл фикрича, АҚШда пандемия оқибатларидан жабр кўрган меҳнат бозорини қайта тиклашга йиллаб вақт керак бўлиши мумкин. Ўтган йилнинг апрелида мамлакатда ишсизлик даражаси бутун пандемия давридаги максимумга — 14,8 фоизга етганди. 2021 йил январига келиб, кўрсаткич 6,3 фоизгача тушди.
Изоҳ (0)