Xitoy Rossiya bilan birgalikda “siyosiy virus”ga qarshi kurashayotganini ma’lum qildi

Xitoy Xalq Respublikasi tashqi ishlar vaziri Van I koronavirus pandemiyasi fonida dunyoda “siyosiy virus” ham tarqalayotganini ma’lum qildi, deb yozadi “Kommersant”.

Xitoy tashqi ishlar vaziri so‘zlariga ko‘ra, Xitoy va Rossiya kuchlarini birlashtirib, yelkama-yelka turgan holda uning tarqalishiga qarshi kurashmoqda. AQSh esa boshqa mamlakatlarning ichki ishlariga “doimiy ravishda surbetlarcha aralashmoqda”.

“Xitoy va Rossiya harakatlarini birlashtirib, pandemiya fonida siyosiy virus tarqalishiga qarshi yelkama-yelka kurashmoqda… Biz voqelikni qalbakilashtirish bo‘yicha har qanday urinishlarga birgalikda kurashamiz, o‘z suverenitetimizni va siyosiy barqarorligimizni himoya qilamiz”, — dedi Van I Pekinda bo‘lib o‘tayotgan mamlakat oliy qonunchilik va kengash beruvchi organlar sessiyasidagi matbuot anjumanida. Vazirning qo‘shimcha qilishicha, Pekin va Moskva rangli inqiloblarga qarshi chiqadi.

AQShning boshqa mamlakatlar ichki ishlariga aralashuvini Van I dunyodagi ko‘p sonli muammolar manbai deb atadi. “Uzoq vaqtlardan buyon AQSh demokratiya va inson huquqlarini himoya qilish bahonasida boshqa mamlakatlarning ichki ishlariga surbetlik bilan aralashib keladi. Bu dunyoda ko‘p sonli muammolarni keltirib chiqaradi, ba’zi hollarda esa turbulentlikka va ziddiyatlarga olib keladi”, — dedi u.

Avvalroq AQSh prezidenti Jo Baydenning ma’muriyati armiyani Rossiya va Xitoy tomonidan keladigan tahdidlarga samarali qarshi turishi uchun qayta tashkil etish va modernizatsiya qilishga tayyorligi ma’lum qilingan edi. “O‘z kuchiga tobora ko‘proq ishonayotgan Xitoy va beqarorlashtiruvchi rol o‘ynaydigan Rossiya bilan strategik raqobatni hisobga olgan holda, biz o‘z kuchlarimiz uchun eng mos tuzilmani, imkoniyatlarni va sonni aniqlaymiz”, — deyilgandi Oq uy saytida e’lon qilingan milliy xavfsizlik bo‘yicha strategiyada.

Shu bilan birga, Qo‘shma Shtatlar dunyoda demokratiyani zo‘ravonlik bilan targ‘ib qilish siyosatidan voz kechishini ma’lum qildi. “Biz demokratiyani oxiri qimmatga tushadigan harbiy operatsiyalar orqali o‘rnatmaymiz. Bundan tashqari, Qo‘shma Shtatlar avtoritar tuzumlarni kuch bilan ag‘darishga qaratilgan urinishlaridan voz kechadi”, — dedi AQSh davlat kotibi Entoni Blinken. Tashqi siyosat bo‘limi boshlig‘ining so‘zlariga ko‘ra, ilgari Vashington tomonidan amalga oshirilgan bunday urinishlar ezgu maqsadlarni ko‘zlaganiga qaramay kutilgan natijalarni bermagan.