Qirg‘iziston Milliy xavfsizlik davlat qo‘mitasi prezident Sadir Japarovning Facebook’dagi sahifasiga xakerlik hujumi uyushtirilgani yuzasidan tekshiruv o‘tkazilishini ma’lum qildi. Bu haqda Kloop agentligi xabar berdi.
Agentlikning ta’kidlashicha, kiberhujum chet eldan amalga oshirilgan. Avvalroq prezident matbuot kotibi Galina Bayterek Sadir Japarovning Facebook’dagi sahifasi xakerlar hujumiga uchragani va uning akkauntidagi so‘nggi izohlarga aloqasi yo‘qligini aytgandi. Bungacha prezident akkauntidan deputat Doston Bekeshevga qaratilgan salbiy izoh qoldirilgan edi.
3-mart kuni deputatlar yangi Konstitutsiya loyihasini muhokama qildi. “Azattik” nashri Facebook’da majlisdan olingan videoni e’lon qildi, u yerda deputat Bekeshev loyihani tanqid qilib, uni “Xonstitutsiya” deb atagan.
Videoni muhokama qilib yozilgan izohlar orasida prezident shaxsiy sahifasi nomidan qoldirilgan izoh ham bor. “Bu ahmoqning faqat ko‘zi emas, ichki dunyosi ham ko‘r ekan — yordamchi”, — deyiladi izohda. Keyinroq u o‘chirib tashlandi.
Ta’kidlanishicha, deputat Doston Bekeshev 6 yoshida ko‘rish qobiliyatidan to‘liq mahrum bo‘lgan.
Ma’lumot uchun 2020-yilning 22-oktabrida niderlandiyalik xaker AQShning sobiq prezidenti Donald Trampning parolini besh urinishda topib, uning Twitter’iga kirgan. Parol maga2020! — Trampning saylovoldi shiori — Make America great again iborasining qisqartmasi bo‘lib chiqqan.
27-oktabr kuni kechqurun esa sayloviga bir hafta qolganda, Donald Trampning saylov shtabi sayti xakerlar hujumiga uchragan. Shtab matbuot kotibi Tim Mertou Twitter’da ma’lum qilishicha, xakerlar maxfiy axborotni qo‘lga kirita olmagan, chunki u aslida saytda saqlanmagan.
The New York Times xabariga ko‘ra, shtab sayti, taxminan, yarim soat davomida ishlamagan. Bu paytda bosh sahifada xakerlar xabari turgan — unda ular bir nechta qurilmalarga hujum uyushtirgani, bu “Tramp va uning qarindoshlariga tegishli ma’lumotlarga to‘liq yo‘l ochib bergani” haqida aytiladi.
Eslatib o‘tamiz, 2020-yilning iyul oyida Twitter’da eng katta kiberhujum sodir bo‘lgan edi. Xakerlar Microsoft asoschisi Bill Geyts, shuningdek, SpaceX asoschisi va Tesla bosh direktori Ilon Maskning akkаuntlarini buzib kirgan.
Biznesmenlarning akkauntlari orqali bitkoinlarni ma’lum bir hamyonga o‘tkazish va kriptovalyutalarni ikki barobar qilib qaytarish to‘g‘risida tvitlar paydo bo‘lgan. Tez orada ushbu tvitlar o‘chirilgan, biroq keyinroq yana e’lon qilingan.
The Verge’ning yozishicha, foydalanuvchilar Mask va Geytsning tvitlarida ko‘rsatilgan bitkoin-hamyonlarga 50 ming dollar miqdorida kriptovalyuta o‘tkazishga ulgurgan.
Ma’lumotlarga ko‘ra, Geyts va Maskning akkauntlaridan tashqari, kriptovalyutalar nashri — CoinDesk, Binance kriptovalyuta birjasi va kriptovalyuta bozoriga taalluqli boshqa kompaniyalarning Twitter’dagi akkauntlari buzib kirilgan. Xakerlar buni qanday amalga oshirgani noma’lum.
Shuningdek, reper Kanye Uest, AQSh sobiq prezidenti Barak Obama, Amazon asoschisi Jeff Bezos, shuningdek, Apple va Uber’ning Twitter’dagi rasmiy akkauntlari ham ushbu xakerlar hujumiga uchragan.
Izoh (0)