AQSh Davlat departamenti qirg‘izistonlik jinoiy avtoritet Kamchi Kolbayevni hibsga olishga yordam beradigan ma’lumot uchun mukofot miqdorini besh baravarga oshirdi. Bu haqda “Interfaks” xabar berdi.
“AQSh Davlat departamenti Kamchi Kolbayevning hibsga olinishi va/yoki sudlanishiga xizmat qiladigan va/yoki Kolbayev boshchiligidagi jinoiy tashkilotining moliyaviy oqimlarini buzishga yordam beradigan ma’lumot uchun mukofot puli 5 million dollarga ko‘tarilganini e’lon qiladi”, — dedi AQSh Davlat departamenti vakili Ned Prays.
Avvalroq Kolbayev haqida ma’lumot uchun mukofot 1 million dollarni tashkil etgan edi.
Davlat departamentining aniqlik kiritishicha, 2000-yilda Kolbayev jinoiy guruh tarkibidagi o‘zining sobiq xo‘jayinini o‘ldirishga urinish va yana ikki kishining o‘limida ayblanib sudlangan. Mazkur jinoyatlar uchun Kolbayev 25 yilga ozodlikdan mahrum qilingan, ammo olti yil o‘tgach, qamoqdan qochib ketgan. 2008-yilda u Moskvada jinoyatchilarning maxfiy yig‘inida jinoiy to‘da boshlig‘i deb e’lon qilingan.
Mavzuga doir: AQSh FQB prezident sayloviga aralashishda ayblanayotgan rossiyalik haqidagi ma’lumot uchun 250 ming dollar mukofot va’da qildi
AQSh Moliya vazirligi ma’lumotlariga ko‘ra, “Birodarlik doirasi” xalqaro jinoiy guruhiga kiruvchi Kolbayev poraxo‘rlik, odam savdosi va boshqa noqonuniy faoliyatlar bilan shug‘ullangan.
So‘nggi marta Kolbayev 2020-yil 22-oktabrda Bishkek shahrida hibsga olingan. 2021-yil, 24-fevral kuni Bishkek shahrining Pervomayskiy tuman sudi Kolbayevni hibsda saqlash muddatini 22-martgacha uzaytirdi. 2-mart kuni esa Bishkek shahar sudi hay’ati uning qamoqdan qochib ketmasligi bo‘yicha ehtiyot choralarni o‘zgartirdi.
Izoh (0)