Олий Мажлис Сенати раисининг биринчи ўринбосари Содиқ Сафоев Alter Ego лойиҳасига берган интервьюсида 24 октябрда бўлиб ўтадиган президент сайловлари ҳақида фикр билдирди, деб хабар бермоқда «Gazeta.uz».
Сенаторнинг фикрича, сайловлар «аслида аввалги йилларда ўтказилган ислоҳотларнинг қандай бораётганлигини баҳолаш бўйича референдум бўлади. Шунинг учун улар жуда муҳим».
«Бошқа томондан, сайловлар мутлақо бошқа шароитларда ўтиши аниқ: бугунги кунда бошқа Ўзбекистон, бошқа фуқаролик жамияти, бошқа оммавий ахборот воситалари, бошқача даражада очиқлик мавжуд. Баҳолаш ҳам қатъий бўлади — тайёргарлик ҳам, сайловларни ўтказиш ҳам», — деб ҳисоблайди у.
Сенат раиси биринчи ўринбосарининг таъкидлашича, давлат олдида икки вазифа турибди.
«Биринчиси ва энг муҳими — халқ сайловлар ҳаққоний ва адолатли эканлигини, ҳақиқатан ҳам улар хоҳлаган номзод танланганлигини кўриши лозим. Иккинчиси, бу ҳам Ўзбекистон имижи учун жуда муҳим — халқаро ҳамжамият, EХҲТ (Европа хавфсизлик ва ҳамкорлик ташкилоти — таҳр.) ва бошқалар ҳам ушбу сайловларни ҳаққоний ва адолатли деб тан олиши. Бу умуман бошқа даражадаги юқори тайёргарлик талаб этади», — деган у.
Содиқ Сафоев сайловларнинг «кейинги ислоҳотлар учун замин» яратишини муҳим деб ҳисоблайди.
«Аниқ ва тўғридан-тўғри айтишим мумкин, мен Шавкат Миромонович Мирзиёевдан бошқа номзодни кўрмаяпман. У ана шу ислоҳотларни бошлаган киши, уларнинг локомотиви, ғоялар генераторидир. Менимча, унга кейинги муддат учун янги мандат бериш Ўзбекистон келажаги учун ҳаётий муҳим аҳамиятга эга», — деб таъкидлаган у.
Шу билан бирга, сенатор сайлов муваффақиятли ўтиши учун муқобил номзодлар бўлиши кераклигини тан олди.
«Албатта, бу ерда муқобил сайловлар, муқобил дастурлар бўлиши керак. Қарама-қаршилик манбаларидан бири бу ижтимоий-сиёсий институт бўлиб, у муайян синфлар, тузилмалар манфаатларини акс эттириши лозим. Сиёсий партияларимиз бугунги кунда етарли даражада ишламаяпти. Улар шунчаки ишламаяпти деса ҳам бўлади. Ахир айнан улар бугунги кунда блогерлар, фуқаролик жамияти, ижтимоий тармоқлар кўтараётган муаммоларни кўтариши керак. Айнан сиёсий партиялар шиорларни, аҳолининг турли қатламлари манфаатларини акс эттирувчи сиёсий дастурни ишлаб чиқиши ва илгари суриши керак», — деб қайд этган Содиқ Сафоев.
Сенат раҳбарининг биринчи ўринбосари партияларнинг пассивлиги ҳақидаги саволга жавоб берар экан, «ҳеч ким президент каби уларни ҳақиқий сиёсий партиялар бўлишга туртки бермаётганини» айтиб ўтган.
«Улар учун барча шароитлар яратилган, уларнинг ҳамма таклифлари амалга оширилмоқда. Ҳаммаси яна кадрларга, одамларга, уларнинг тайёргарлик даражасига бориб тақалади. Лекин ишончим комил, жараён давом этмоқда. Бу бошқа сиёсий партиялар бўлади.
Кўриниб турибдики, биз ислоҳотларни баҳолаш бўйича референдум ҳақида гапирадиган бўлсак, бу ислоҳотларни унча ҳам ёқтирмаётган одамлар бор, улар турли сабабларга кўра бизда ҳозир олиб борилаётган модернизацияни амалга ошишини истамайди. Ушбу спектрни акс эттирадиган сиёсий партиялар бўлиши керак. Одамлар бу масалани ўртага ташлайдиган сиёсий партия номзодига овоз берсин», — деган у.
Сенатор муқобил дастурлар ва номзодларсиз «сайловларни тўлақонли, адолатли ва ҳаққоний деб баҳолаб бўлмаслигини» яна бир бор таъкидлаган.
Содиқ Сафоев мустақил номзодларнинг президентликка ва депутатликка мустақил равишда илгари сурилиши мумкин эмаслиги тўғрисида ҳам фикр билдирди. У ҳозирда бу қонунчиликда кўрсатилмаганлигини тан олди, аммо ўзини ўзи номзод қилиб кўрсатиш имконияти йўқлиги очиқ сайловлар ўтказилишига имкон бермайди, деб ҳисобламайди.
«Йўқ, асло. Сиёсий партиялар, агар улар ҳақиқий сиёсий партиялар бўлса, буни ўзларига сингдиришлари мумкин. Биз бу масала бўйича баҳслашишимиз, конференция ўтказишимиз мумкин. Буни ёқлайдиган ва бунга қарши кўп аргументлар бор… Мен бир нарсани айтишим мумкин, олдинда бир нечта конференциялар бор ва ушбу мустақил номзодлар масаласи ҳам (кун тартибида) турибди», — деган сенатор.
Эслатиб ўтамиз, Президент Шавкат Мирзиёев 29 декабрь куни Олий Мажлисга йўллаган Мурожаатномасида 2021 йилда ўтказиладиган «давлат ва халқ ҳаётидаги муҳим сиёсий ҳодиса» — президентлик сайловлари масаласига тўхталиб ўтганди. Ўшанда Шавкат Мирзиёев Марказий сайлов комиссияси «бўлажак сайловларнинг миллий қонунчилик ва умумэътироф этилган халқаро демократик тамойиллар асосида юксак савияда ташкил этилишига алоҳида эътибор қаратиши» лозимлигини таъкидлаганди.
Ўзбекистонда Президент сайловлари декабрдан октябрга кўчирилган. Сайлов муддатлари кўчирилиши юзасидан Олий Мажлис Қонунчилик палатаси изоҳ берганди. Республикада президент сайловига тайёргарлик 2021 йил 1 мартдан бошланиши маълум қилинган.
Изоҳ (0)