Ижтимоий тармоқларда Фарғона вилоятининг Ўзбекистон тумани «Карим девона» маҳалласи яқинида фаолият юритаётган цемент ва алебастр заводлари аҳоли саломатлиги ва атроф-муҳит тозалигига зарар етказаётгани ҳақида хабарлар тарқалди. Аҳоли болалар аллергияга чалинаётгани, ўпка, нафас йўллари касалликлари кўпаяётганидан шикоят қилган.
Фарғона вилояти Экология ва атроф-муҳитни муҳофаза қилиш бошқармаси ушбу ҳолат юзасидан ўрганиш олиб борилганини маълум қилди.
Қайд этилишича, ўрганиш давомида Ўзбекистон тумани Шўрсув шаҳарчаси ҳудудидаги 35 та қурилиш маҳсулотлари ишлаб чиқариш корхоналари фаолият кўрсатаётгани аниқланган.
Шўрсув шаҳарчасида аҳоли яшаш пунктларидаги гипс ишлаб чиқариш корхоналари атрофидан чанг миқдори таҳлил қилинганида 1.1мг/м3 дан 1.9 мг/м3 гача ортганлиги маълум бўлган. Бу ҳолат аҳоли ўртасида юқори нафас йўллари касалликлари, ларингит, сурункали бронхитлар, сил касалликлари ва шунга ўхшаш касалликларни кўпайишига сабаб бўлмоқда. Юқоридагилардан келиб чиқиб, ушбу корхоналарга ишлаб чиқариш жараёнида ҳосил бўладиган гипс, алебастр чанглари ва бошқа зарарли моддаларни ушлаб қолиш, фильтр ўрнатиш чораларини кўриш талаби қўйилди.
Текшириш якунлари бўйича корхоналарга чанг ва газ ушлаш қурилмаларини ўрнатиш бўйича мажбурий топшириқлар берилган бўлиб, юқорида зикр этилган корхоналар томонидан чанг ва газ ушлаш қурилмалари ўрнатилди.
Шунингдек, корхона раҳбарларига маъмурий баённомалар расмийлаштирилиб, ҳудудий маъмурий суд органларига қонуний чора кўриш учун юборилган.
Изоҳ (0)