Энергетика вазирлиги Ўзбекистондаги газ-заправкалар яна 24 соатлик иш режимига ўтгани тўғрисида тарқалган хабарларга муносабат билдирди, деб ёзади «Халқ сўзи online».
Ижтимоий тармоқларда «3 мартдан бошлаб газ заправкалар 24 соатлик иш режимига ўтди», деган хабарлар тарқалди. Энергетика вазирлиги матбуот котиби газ заправкалар фаолиятига қўйилган чеклов об-ҳавога боғлиқлигини маълум қилди.
«Заправкалар ишлаши тўлиқ 24 соатлик режимга ўтилди, деб айтолмаймиз. Бу об-ҳаво билан боғлиқ бўлган ҳолат. Ҳаво ҳарорати яхши бўлган ҳудудларда маҳаллий ҳокимият ва газ таъминоти корхоналари келишган ҳолда заправкаларни одатдаги иш тартибига ўтказишлари мумкин. Агар яна ҳаво ҳарорати пасайиб, аҳоли ва ижтимоий соҳа объектларида газ етишмовчилик кузатилса, яна чекловлар киритилиши мумкин», — деди Элмира Бекмуродова.
Эслатиб ўтамиз, Тошкент шаҳридаги автомобилларга газ тўлдириш шохобчаларининг газ узатиш графигига 7 декабрдан бошлаб вақтинчалик чеклов ўрнатилган, шунингдек, январь бошида Ўзбекистондаги барча газ заправкалар соат 15:00 дан 05:00 гача ёпилишни бошлаган эди. 18 январдан Ўзбекистондаги газ заправкалар суткасига яна 24 соатдан ишлай бошлаган, бироқ январь охирларида об-ҳавонинг кескин совиши оқибатида яна чеклов ўрнатилган эди.
Изоҳ (0)