Олмалиқ кон-металлургия комбинатининг Рух заводида амалга оширилаётган модернизация ва реконструкция ишлари доирасида замоний ускуналар билан таъминланган иккита лаборатория фойдаланишга топширилди.
Заводнинг сульфат кислотаси ҳамда кадмий цехлари тасарруфидаги бу лабораторияларга ўрнатилган (Германия давлатида ишлаб чиқарилган ) ICP индуктив плазмали атом эмиссион спектрометри Менделеев даврий жадвалидаги инерт газларидан ташқари, барча элементлар таҳлилини ўтказиш имкониятига эга. Мазкур ускуна технологлар томонидан талаб этилаётган кўплаб элементларнинг миқдор анализини сифатли, узлуксиз ва юқори даражада хатоликларсиз бажарилишини таъминлайди.
«Эндиликда битта эритманинг ўзидан таҳлил жараёнида таркибидан 50 тагача элементни аниқлай олиш имконияти яратилди. Лабораторияларимиз экспресс таҳлил ўтказиши билан аҳамиятли. Шунингдек, Spectro Xepos рентген спектраль анализатори ҳам олинган ва яқин кунларда ишга туширилиши режалаштирилган. Ҳозирда шу анализаторни ишга тушириш чора-тадбирлари амалга оширилмоқда.
Хавфсизлик нуқтаи назаридан лаборантлар радиация хавфсизлиги борасида Республика Соғлиқни сақлаш вазирлиги қошидаги Тошкент врачлар малакасини ошириш институтида малакаларини оширмоқда. Экспресс таҳлил қилишда ушбу ускуна жуда аҳамиятли. Аввал аналитик кимёда титрлаш услубида таҳлил қилиш мумкин эди. Ҳозирда мазкур замонавий ускуналар билан жиҳозланган лабораторияларда ҳар қандай элементнинг намунасини таҳлил этиш имконияти бор», — дейди Рух заводи кимёвий ишлаб чиқариш лабораторияси гуруҳ раҳбари Наргиза Отақулова.
Шунингдек, сульфат кислотаси цехи лабораторияси ҳам замонавий ускуналар билан жиҳозланди. Бу ерда ярим томчи сульфат кислотаси намунаси таҳлилидаги хатолик ҳам жуда катта рол ўйнайди. Ўта аниқликда ишловчи бу ускуналар эса хатоликка йўл қўймайди.
Мазкур лабораториялардаги эски аналитик жиҳозлар янгилари билан алмаштирилди. Жумладан, KFK фотоэлектроколориметр, электрон иономер, электрон намликни аниқловчи анализатор, аналитик ҳамда электрон техник тарозилар, муфель ва қуритиш печлари каби янги лаборатория жиҳозлари билан таъминланган.
Реконструкция доирасида Рух заводининг танлаб эритиш ва электролит цехларидаги лабораториялари ҳам яқин кунларда ишга туширилади. Ишлаб чиқариш қувватларини модернизация қилиш, саноат тармоқларини техник ва технологик жиҳозлаш, комбинатда ишлаб чиқарилаётган маҳсулотларнинг рақобатбардошлигини таъминлаб, экспорт салоҳиятини юксалтиришга хизмат қилади.
Маълумотлар шериклик ҳуқуқи асосида тайёрланди.
Изоҳ (0)