Чинозда ноқонуний қурилишдаги авария оқибатида уч киши ҳалок бўлган. Бу ҳақда тўрт йил ўтиб — Жиззахдаги олти қаватли бино қулагач маълум қилинди

Ўзбекистон қурилиш вазири Ботир Зокиров Жиззах шаҳридаги қурилиши якунланмаган олти қаватли бинонинг қулаши муносабати билан 14 январь куни ўтказилган матбуот анжуманида «икки йил аввал Тошкент вилоятида юз берган шунга ўхшаш фалокат натижасида уч киши ҳалок бўлган»ини маълум қилган эди. Қурилиш вазирлиги «Дарё» сўровига асосан вазир таъкидлаган ҳодиса ҳақида маълумот берди.

Маълум бўлишича, 2017 йили Чиноз шаҳридаги икки қаватли умумий овқатланиш биносининг орқа томонидан ўзбошимчалик билан, лойиҳа ҳужжатлари ишлаб чиқилмай, ноқонуний равишда қўшимча бино қурилган. Қурилиш вазирлигининг изоҳида қайд этилишича, «мавжуд бинонинг ‘0’ (нол) отметкадан пастки қисмида ертўла қазилган, бунда стакансимон колонна пойдевори ўзбошимчалик билан олиб ташланган».

Бундан ташқари, бинонинг 2-қаватидан юқори қисмида очиқ майдон сифатида фойдаланиш мақсадида том қисми олиб ташланиб, темирбетон плиталар устига 3 минг дона кичик бетон блоклар олиб чиқилган. Ҳисобий юклар ортгани, конструкцияларда зўриқиш бўлгани сабаб бинонинг темирбетон плиталари қулаб, авария содир бўлган. Уч кишининг ўлимига сабаб бўлган фалокатдан сўнг бино унинг эгаси ҳисобидан бузиб ташланган.

Ҳодисанинг бошқа тафсилотлари маълум қилинмаган.

Эслатиб ўтамиз, 10 январь куни Жиззах шаҳрида қурилиш якунланмаган олти қаватли бинонинг бир қисми қулаб тушган эди. Ҳодиса оқибатида унинг ёнидаги иншоот ҳам зарар кўрган, ҳеч ким тан жароҳати олмаган. Ушбу ҳодисадан сўнг жиноят иши қўзғатилган, ҳукумат комиссияси тузилган, кейинроқ бинонинг қолган қисми ҳам бузиб ташланган. Ушбу воқеага муносабат билдираркан, президент Шавкат Мирзиёев «Жиззах вилоятининг қурилиш бўйича ўринбосари бизнинг сиёсатимизга хиёнат қилган»ини, «унинг бутун тўдасига қонуний жазо кўриш керак»лигини таъкидлаган эди. Кейинроқ Жиззах вилояти ҳокими ўринбосари Акрам Раҳмонқулов ишдан олингани, унга нисбатан жиноят иши қўзғатилгани маълум бўлди.

Аввалроқ, 2019 йил августида Тошкентдаги Riviera савдо мажмуасининг қурилишида юз берган авария оқибатида тўрт киши ҳалок бўлгани, октябрида Tashkent City’даги объектлардан бирининг қурилишида қатнашаётган ишчи саккизинчи қаватдан қулаб қурбон бўлгани, декабрь ойида Юнусобод метро йўлининг янги станцияларини қуриш вақтида юз берган фожиа оқибатида олти киши вафот этгани ҳақида хабар берилган эди. Шунингдек, Қибрайда бетон заводининг девори қулаши оқибатида уч киши, Қарши шаҳрида қурилиши битмаган бинодаги темир-бетон конструкциялари қулаши оқибатида бир киши, Деҳқонободдаги қурилаётган дўконнинг бетон плиталари қулаши оқибатида бир киши ҳалок бўлган эди.