Тошкент шаҳрида ўтказилган «Хавфсиз пойтахт» профилактик тадбирлари доирасида Бектемир туманида жойлашган Қўйлиқ деҳқон бозори ҳудудидаги «Шукрона» ошхонасида ноқонуний лотерея ўйинлари ташкил этилгани аниқланди, дея хабар бермоқда шаҳар ИИББ матбуот хизмати.
Тошкент шаҳар ИИББ жиноят қидирув бошқармаси, ДХХ ва шаҳар прокуратураси ходимлари томонидан 16 февраль, сешанба куни олиб борилган тезкор тадбирлар натижасида ошхона ичида «Лото Бинго» номли ўйинда 21 нафар шахс ҳар бир билетга 2500 сўм тикиш йўли билан таваккалчиликка асосланган ютуқли ўйинда иштирок этаётгани маълум бўлди.
Лотерея ўйини ташкилотчилари томонидан давлат рўйхатидан ўтмасдан, юридик мақомига эга бўлмай туриб, рухсат этилмаган ва махсус жиҳозланмаган жойда, яъни ошхонада ўйинлар ташкиллаштирилгани сабабли жиноят ҳолати келиб чиққан.
Воқеа жойига жалб қилинган тезкор тергов гуруҳи томонидан ўйинда бўлган 144 дона омадли рақам, 152 дона олмос бахтли рақам, 90 дона ёғочдан ясалган ўйин тоши, 750 дона тахтадан ясалган фишка, 735 минг сўм пул ҳамда фуқароларни жалб қилиш учун фойдаланилган микрофон ва овоз кучайтиргич далилий ашё сифатида расмийлаштирилган.
Мазкур ҳолат юзасидан лотерея ўйинини ташкил этган 3 нафар шахсга нисбатан жиноий иш қўзғатилган бўлиб, ўйин иштирокчилари эса маъмурий жавобгарликка тортилган.
Маълумот учун, қимор ва таваккалчиликка асосланган бошқа ўйинларни қонунга хилоф равишда ташкил этиш ёки ўтказиш тақиқланади. Мазкур жиноятни содир этганлик учун Жиноят кодексининг 278-моддасига (қимор ва таваккалчиликка асосланган бошқа ўйинларни ташкил этиш ҳамда ўтказиш) кўра, 7 йилгача озодликдан маҳрум этиш тайинланиши мумкин.
Бундай ўйинларда иштирок этганлар эса Маъмурий жавобгарлик кодексининг 191-моддасига (маиший шовқинга қарши кураш талабларини бузиш) кўра, БҲМнинг 15 баробаригача жаримага тортилиши белгиланган.
Бундан аввал Тошкентда 13 нафар қиморбознинг ҳар бири беш суткага қамалгани, яшаш уйида қиморхона ташкил этган самарқандлик эркакка нисбатан жиноят иши қўзғатилгани ҳамда Бухородаги хонадонда хўроз уриштириш ўйинлари ўтказаётган 40 нафар шахс аниқлангани ҳақида хабар берилганди.
Изоҳ (0)