АҚШ Миллий иммунизация ва респиратор касалликлари маркази вакили доктор Аманда Кон коронавирусга қарши вакцина самара берган, бермаганлигини аниқлашнинг осон йўлини маълум қилди, деб ёзмоқда Deseret News.
Шифокор препаратнинг самарадорлигини кўрсатувчи учта белгини санаб ўтди. Биринчи белги — шприс ўрнида оғриқ қолиши. Иккинчи белги — чарчоқ, чунки кишилар вакцина қабул қилганидан сўнг ўзларини жуда толиққан ҳис қилаётгани ҳақида айтган. Охирги белги бу 37,1-38,0 °C оралиғидаги субфебрил ҳарорат билан иситмалаш.
Мутахассиснинг сўзларига кўра, ушбу белгиларнинг барчаси вакцинанинг вирусга қарши курашиш учун организм мудофаасини кучайтириш чораларини олиб бораётганидан далолат беради. Коннинг таъкидлашича, ножўя таъсирлар одатда бир неча кун давом этади ва бундан ташвишланмаслик керак.
«Бу COVID-19 эмас. Бу сизнинг танангиз касалликка тақлид қилувчи оқсилга нисбатан иммунитет ҳосил қилаётганини билдиради» — деди шифокор.
Шунингдек, олимларнинг тадқиқотларига кўра, COVID-19’дан тузалганлар учун вакцинанинг иккинчи дозаси шарт бўлмаслиги мумкин. Коронавирусдан тузалган одамнинг танасида вирусга қарши вакцинанинг биринчи дозасидан кейин зарур иммунитет реакцияси пайдо бўлади. Тадқиқотларда коронавирусдан тузалган беморларда иммунитет миқдорининг юқорилиги вирусга чалинмасдан, вакцинанинг ҳар иккала дозасини қабул қилган кишилардаги иммунитет миқдори билан баравар экани маълум бўлди.
Аввалроқ олимлар коронавирусга қарши вакциналар COVID-19’нинг янги штаммлари пайдо бўлиши сабабли вақт ўтиб эскириши мумкинлиги ҳақида огоҳлантирганди. Ҳозирда Буюк Британия, АҚШ ва коронавирусга қарши вакциналарни ишлаб чиқарган ҳамда чиқараётган бошқа давлатлар мутацияга учраган вирусдан самаралироқ ҳимоя қилиш учун вакциналарни янгилаш вариантларини изламоқда.
Изоҳ (0)