Хоразм вилояти Шовот туманида жойлашган чойхоналарнинг бирида ис газининг сизиб чиқиши оқибатида бир оиланинг уч аъзоси ҳалок бўлди. Бу ҳақда Бош прокуратура матбуот хизмати хабар берди.
Маълум қилинишича, 20 февраль куни соат 17:40 ларда туманнинг «Шовот» маҳалласида жойлашган «Ортиқ ота» номли чойхонада унинг эгаси К.О., турмуш ўртоғи И.С. ҳамда уч нафар фарзанди чойхонанинг ошхонасида жойлашган газ ўчоғидан газ сизиб чиқиши натижасида заҳарланган.
Натижада К.О., унинг турмуш ўртоғи И.С. ва фарзандларидан бири ҳодиса жойида вафот этган, шунингдек, икки нафар фарзанд кучли заҳарланиш аломатлари билан шифохонага ётқизилган.
Мазкур ҳолат юзасидан туман прокуратураси томонидан терговга қадар текширув ҳаракатлари ўтказилмоқда.
Аввалроқ Хоразмда 31 ёшли аёл ва унинг 10 ёшли қизи, Қорақалпоғистонда бир оиланинг 4 нафар аъзоси ва 2 нафар меҳмон ҳамда Сирдарёда 31 ёшли аёл ва унинг вояга етмаган 3 нафар фарзанди ис газидан заҳарланиб вафот этгани ҳақида хабар берилганди. Шунингдек, Навоийда икки нафар ака-ука ис газидан заҳарланиб вафот этгани, Самарқандда қўлбола печдан ис гази сизиб чиқиши оқибатида ёш эр-хотин вафот этгани хабар берилган, кейинроқ улар икки кун аввал турмуш қургани маълум бўлганди.
Изоҳ (0)