Xorazm viloyati Shovot tumanida joylashgan choyxonalarning birida is gazining sizib chiqishi oqibatida bir oilaning uch a’zosi halok bo‘ldi. Bu haqda Bosh prokuratura matbuot xizmati xabar berdi.
Ma’lum qilinishicha, 20-fevral kuni soat 17:40 larda tumanning “Shovot” mahallasida joylashgan “Ortiq ota” nomli choyxonada uning egasi K.O., turmush o‘rtog‘i I.S. hamda uch nafar farzandi choyxonaning oshxonasida joylashgan gaz o‘chog‘idan gaz sizib chiqishi natijasida zaharlangan.
Natijada K.O., uning turmush o‘rtog‘i I.S. va farzandlaridan biri hodisa joyida vafot etgan, shuningdek, ikki nafar farzand kuchli zaharlanish alomatlari bilan shifoxonaga yotqizilgan.
Mazkur holat yuzasidan tuman prokuraturasi tomonidan tergovga qadar tekshiruv harakatlari o‘tkazilmoqda.
Avvalroq Xorazmda 31 yoshli ayol va uning 10 yoshli qizi, Qoraqalpog‘istonda bir oilaning 4 nafar a’zosi va 2 nafar mehmon hamda Sirdaryoda 31 yoshli ayol va uning voyaga yetmagan 3 nafar farzandi is gazidan zaharlanib vafot etgani haqida xabar berilgandi. Shuningdek, Navoiyda ikki nafar aka-uka is gazidan zaharlanib vafot etgani, Samarqandda qo‘lbola pechdan is gazi sizib chiqishi oqibatida yosh er-xotin vafot etgani xabar berilgan, keyinroq ular ikki kun avval turmush qurgani ma’lum bo‘lgandi.
Izoh (0)