Тошкент вилояти ИИББ Уюшган жиноятчиликка қарши курашиш бўлими ходимлари томонидан аслида ҳеч қаерда рўйхатда бўлмаган уйларни 100 минг долларга сотишга уринган жиноий гуруҳ аъзолари қўлга олинди. Бу ҳақда ИИББ ахборот хизмати хабар берди.
Таъкидланишича, 17 февраль куни Тошкент вилояти ИИББга Тошкент шаҳрида яшовчи фуқаро R.T. ариза билан мурожаат қилган. У мурожаатида Дилнура, Нодира ва Азиз исмли шахслар Нурафшон шаҳрида жойлашган (аслида ҳеч қаерда рўйхатда бўлмаган) 3 та ҳовлини кадастр ҳужжатларини қалбакилаштириб, 100 минг долларга сотмоқчи бўлаётганини маълум қилиб, ушбу шахсларга нисбатан қонуний чора кўришни сўраган.
Мазкур аризага асосан, 19 февраль куни Тошкент вилояти ИИББ Уюшган жиноятчиликка қарши курашиш бўлими ходимлари ва соҳавий хизмат ходимлари ҳамкорлигида тезкор тадбир ўтказилган.
Тадбир давомида Нурафшон шаҳрида яшовчи 1980 йилда туғилган Дилнура А. (ҳозирда фирибгарлик ва пора бериш жиноятлари билан тергов остида бўлган), танишлари 1997 йилда туғилган Азиз Ғ. (2019 йилда фирибгарлик жинояти билан судланган) ва 1997 йилда туғилган Нодира И. ариза муаллифидан талаб қилинган пулларнинг 30 минг долларини олаётган вақтида далилий ашёлар билан қўлга олинди.
Ушланган шахслардан 30 минг доллар миқдоридаги нақд пул, Нодира И. ва Гулнора А. номига расмийлаштирилган Нурафшон шаҳар «Наврўз» МФЙда жойлашган 18-А ва 18-Б рақамли ҳамда Дилнура А. номига расмийлаштирилган «Истиқлол» МФЙда жойлашган 10-рақамли уйларнинг қалбакилаштирилган (ҳоким қарор ва бошқалар) кадастр ҳужжатлари холислар иштирокида далилий ашё сифатида расмийлаштирилиб олинган.
Ҳозирда қўшимча суруштирув ишлари олиб борилмоқда.
Аввалроқ Сирдарёда тадбиркорларга зўравонлик қилиб, улардан улуш ундириб келган жиноий тўда аъзолари қўлга олингани тўғрисида хабар берилганди.
Изоҳ (0)