Иккита камера, улкан аккумулятор ва Android 10’га эга соат тақдим этилди. Rollme Hero’нинг дастлабки харидорлари уни ярим нархида сотиб олиши мумкин

Хитойнинг Rollme компанияси 2020 йилнинг кузида тақдим этилган Rollme Hero соатларини сотувга чиқарди, деб хабар беради IXBT.

Rollme Hero ромсиз дизайн, смартфон функцияси, соатлар учун жуда катта бўлган аккумулятор сиғими, шунингдек, Google Play онлайн дўконини қўллаб-қувватлайдиган Android 10 операцион тизимига эга.

Соатлар ҳамёнбоп смартфонларда учратиш мумкин бўлган ўзига хос жиҳатларга эга бўлган. Қурилма экранига 8 ва асосий 13 мегапикселли камера, бир кристалли MediaTek Helio P22 тизими, 3/4 Гб тезкор хотира, 32/64 ички хотира, шунингдек, 1600 мА/соат аккумулятор ўрнатилган.

Соатлар 4G LTE алоқа тармоғи функциясини қўллаб-қувватлайди, у смартфонга уланмасдан туриб, қўнғироқларни қабул қилиш ва амалга оширишга қодир. Ишлаб чиқарувчининг сўзларига кўра, соат автоном ҳолатда 10 кун ишлай олади. Юз ёрдамида блокдан чиқариш имконияти ҳам бор.

Rollme Hero «ақлли» соатларга хос бўлган оддий функцияларни ҳам бажаради. Экран диаметри 1,69 дюйм, пикселлари сони 450х450. GPS, компас, альтиметр ва барометр, қадамларни ҳисоблагич, пульсни назорат қилгич ва ўнлаб спорт режимлари мавжуд, сувдан (10 АТМ) ҳимояланган. Соатлар эни 18,5 миллиметрни ташкил этади.

Айни вақтда Rollme Hero соатларини катта чегирма билан харид қилиш мумкин — Banggood’да 200 доллар эвазига. Стандарт нархи эса 400 долларни ташкил этади.

Аввалроқ Xiaomi 45 долларлик Redmi Watch «ақлли» соатларини тақдим этгани тўғрисида хабар берилганди.