Oppo силжийдиган фронтал камерага эга смартфонини намойиш этди

Oppo компанияси бир бурчакдан бошқасига силжий оладиган ноодатий селфи-камерага эга қурилмани ўйлаб топди, деб хабар беради Hi-Tech.Mail.ru.

Камера модули блокка ўрнатилган бўлиб, у орқали камерани чап ёки ўнг томонга силжитиш мумкин. Бу каби силжиш композицияни осонгина таҳрирлаш ва турли бурчаклар остида суратга олишни таъминлайди. Масалан, фойдаланувчи тўғрига қараб турган бўлса ҳам, бурчак остида суратга олишни амалга оширса бўлади.

Одатдаги ҳолатда камера белгиланган жойни эгаллайди. Силжиш жараёни тўлиқ автоматик, бироқ фойдаланувчининг ўзи у қайси томонда туриши кераклигини белгилайди.

Патентда эълон қилинган суратларга кўра, камералар тизими экран остида жойлашган ва эни бўйлаб қурилманинг деярли бутун юқори қисмини эгаллаган.

Афтидан, бу каби технологиядан қурилманинг орқа панелини шакллантиришда ҳам фойдаланса бўлади. Мазкур ҳолатда смартфон панорама суратларни тасвирга олиш учун идеал қурилмага айланади.

Компания ушбу янги ихтирони ноодатий камералар тизими хос бўлган Oppo Reno смартфонлари сериясига жорий этиши мумкинлиги айтилмоқда. Конструкциясидан келиб чиқиб бу перископ (Reno2 Z) ёки «сузгич» (Reno2) бўлиши мумкин.

Аввалроқ Vivo силжийдиган камерага эга янги флагманини тақдим этгани, шунингдек, Samsung ҳам силжийдиган камерага эга смартфон устида ишлаётгани тўғрисида хабар берилганди.