Ижтимоий тармоқларда сув минораси устига чиқиб олиб, ўз жонига қасд қилишга уринган аёлнинг хатти-ҳаракати акс этган видеолар тарқалди. Қизғин муҳокамаларга сабаб бўлган мазкур ҳолатга аниқлик киритиш мақсадида «Дарё» мухбири Андижон вилояти ИИБ ахборот хизматига мурожаат қилди.
Маълум бўлишича, ушбу ҳолат жорий йилнинг 19 февраль куни Шаҳрихон туман ИИБ ҳудудида кузатилган.
«Мазкур вазият бўйича Андижон вилояти ИИБ масъул ходимлари томонидан атрофлича ўрганиш ишлари олиб борилди. Аниқланишича, шу пайтга қадар 7 маротаба судланиб, маъмурий назоратда бўлган фуқаро М.К.га нисбатан Шаҳрихон туман ИИБ ҳузуридаги тергов бўлими томонидан Жиноят Кодексининг 226-моддаси 1-қисми (устидан маъмурий назорат ўрнатилган шахснинг маъмурий назорат қоидаларини бузиши) билан жиноят иши қўзғатилган. Жиноят иши бўйича тергов ҳаракатлари ўтказиш мақсадида 2021 йилнинг 19 февраль куни ушбу фуқаро туман ИИБга чақирилган.
У ўша куни туман ИИБга турмуш ўртоғи В.М. билан бирга келган. М.К. билан тергов ҳаракатлари олиб борилаётган вақтда туман ИИБ биносининг кутиш залида қолган рафиқаси В.М. ўзининг эътирозларини маълум қилиш мақсадида ИИБ ҳудудида жойлашган сув минорасининг устига чиқиб олган. У ‘Эримни жавобгарликка тортмайсан’, деган талабини айтиб, ўзини сув минораси устидан ташламоқчилигини таъкидлаган.
Олиб борилган тушунтириш ишлари натижасида М.К.нинг турмуш ўртоғи В.М. сув минорасининг устидан пастга туширилган ва улар яшаш уйига жўнатиб юборилган. Ҳозирда М.К.га нисбатан қўзғатилган жиноят иши бўйича тергов ҳаракатлари давом эттирилмоқда ва фуқаро тергов жараёнига уйидан қатнамоқда», дейилади Андижон вилояти ИИБ ахборотида.
Изоҳ (0)