Ijtimoiy tarmoqlarda Xorazm viloyati Xazorasp tumanida bir odam ko‘p qavatli binodan o‘zini tashlamoqchi bo‘lgani tasvirlangan video tarqaldi. Ushbu hodisa haqida “Zamon.uz” Xorazm viloyati IIB matbuot xizmatiga tayanib ma’lumot berdi.
Kadr: Videodan skrinshot
Ma’lum bo‘lishicha, voqea 23-yanvari kuni soat 13:30 larda Xazorasp tumani tibbiyot birlashmasida sodir bo‘lgan. Xazorasp tumanida yashovchi 1977-yil tug‘ilgan shaxs tibbiyot birlashmasi tomiga chiqqan.
O‘zini tomdan tashlamoqchi bo‘lgan shaxs tibbiyot birlashmasi xodimlari tomonidan pastga olib tushilgandan keyin ma’lum bo‘lishicha, u o‘zining xatti- harakatlarini anglay olmaydigan darajada kuchli mast holatda bo‘lgan. Fuqaro oila a’zolari hamrohligida qo‘yib yuborilgan.
Hozirda Xazorasp IIB tomonidan shaxsning xatti-harakatlariga huquqiy baho berish uchun surishtiruv ishlari olib borilmoqda.
Avvalroq Shirin shahar hokimligi “hayotdan charchab”, ikki bolasini kanalga oqizib yubormoqchi bo‘lgan ayol voqeasi bo‘yicha izoh bergani, Toshkentdagi “Sayohat” mehmonxonasida karantinda bo‘lgan erkak to‘rtinchi qavatdan sakrab o‘z joniga qasd qilgani hamda Toshkentda nochor ahvolda qolgan farg‘onalik ayol o‘zini elektr uzatish ustunidan tashlamoqchi bo‘lgani haqida xabar berilgandi.
