Ўзбекистон ташқи ишлар вазири Абдулазиз Комилов 23 февраль куни Афғонистонга амалий ташриф билан боради, деб хабар бермоқда вазирлик матбуот хизмати.
Бўлажак учрашувлар ва музокаралар чоғида Ўзбекистон—Афғонистон муносабатларининг ҳозирги ҳолати ва келгусида ривожланиш истиқболларини муҳокама қилиш режалаштирилган.
Минтақалараро савдо айланмасини ошириш, Марказий ва Жанубий Осиёни боғлайдиган қўшма транспорт-коммуникация лойиҳаларини амалга оширишнинг янги имкониятлари бўйича фикр алмашилади.
Аввалроқ Абдулазиз Комилов Қозоғистон президенти билан учрашиб, унга Шавкат Мирзиёевнинг мактубини топширгани, Қозоғистон томони 2021 йилда Тошкент шаҳрида бўлиб ўтадиган «Марказий ва Жанубий Осиё: минтақавий боғлиқлик. Таҳдидлар ва имкониятлар» мавзусидаги халқаро конференцияга таклиф қилингани ҳақида хабар берилган эди.
Шунингдек, Туркманистон ва Тожикистон раҳбарлари ҳам Тошкентда бўлиб ўтадиган ушбу халқаро конференцияга таклиф этилган.
Конференция 2021 йил 20—21 май кунлари ўтказилиши режалаштирилган.
Изоҳ (0)